Х.Баттулга хоёр ч Засгийн газарт “давхар дээл”-тэй халууцаж, сүүлдээ улстөрийн тоглолт хийх шалтгаанаар “давхар дээл”-ээ тайлах хүсэлт гаргаадхав. Түүний туйлын хүслэн бол Ерөнхий сайдын суудал. Үүнээс дамжаад Ерөнхийлөгч гэсэн хэтийн төлөвлөгөө байгааг ойр дотныхон нь хэлдэг. Тиймээс энэ л хүсэл зорилгодоо хүрэх гэж улайрах нь хэрээс хэтэрсэн явдал боллоо. Энэ ч яахав, хүний хүсэл мөрөөдөлд хязгаар гэж байх биш. Шинэ мэдээллээ хүргье. Юутай ч тэр АН дотор хагарал үүсгэж чадсан. Тохироо ёсоор Н.Алтанхуяг суудлаа өгөхгүй бол тэр юу ч хийхээс буцахгүй бухимдаж сууна.     Орон орны үндэсний их хувьсгал, бослого тэмцлийг ард олонд түгээж, энэ зүгт битүүхэн уриалаад ч байх шиг. Өөрийн мэдэлд байх хэвлэл мэдээллийн хэрэгслүүд бүгд л бослого тэмцлээр ард түмний тархийг угаах болсон нь ч санамсаргүй хэрэг биш. АН дотроо хүчирхэг фракцийг тэргүүлдэг Х.Баттулга фракцаа аваад нам байгуулах тухай эх сурвалжийн мэдээлэл ч бий.      Яахав, энэ бол байж болох зүйл. Хэрвээ Х.Баттулга нам байгууллаа гэхэд Н.Энхбаярын МАХН шиг юм босгочихож л таарна. Магадгүй үүнээс арай дөмгүүр нам босгохыг ч үгүйсгэхгүй. Өнөөдрийн эрх баригч намын арчаагүй байдал, ажлын үзүүлэлт, авлига хээл хахууль, алдаа завхрал гээд олон зүйлийг өөрсдийнх эсрэг ашиглахаар Х.Баттулга ард түмнээс боломжийн үнэлгээ авч таарна. Нөгөө талаар МоАХ-ны үндэс суурин дээр байгуулсан Х.Баттулгын намд дагаар орох нөхөд АН дотор олон бий. Н.Алтанхуягтаа гомдсон нөхдүүд үй олноороо байгаа. Хэдийгээр яам нэмж байгуулаад ч тэднийг багтаах орон зай Монголын төрд үгүй болохоор гомдогсодын бүлэглэл тэр чигтээ Х.Баттулгад дагаар орж таарна.      Бидэнд бэлэн жишээ бий шүү дээ. Н.Энхбаяр, М.Энхсайхан нарын гологдогсодыг дагаад баахан гомдогсод нэгдсэн нь өнөөдрийн “Шударга ёс” эвсэл шүү дээ. Яах аргагүй л төрөөс мөнгө зулгааж, татвар төлөгчдийг холгоод мануухай болон сууж л байна. Энэ мэтээс харвал Х.Баттулгад боломж харагдаж л таарна. Х.Баттулгаас өмнө гомдож одсон М.Энхсайхан ч түүнтэй хүчээ хавсарч таарна. Н.Энхбаяртай санал зөрөх болоод удсан М.Энхсайхан ахиад шаансгүй болсон МАХН-тай цаашид нэгдээд хол явахгүйгээ мэдэж байгаа. Х.Баттулгад хүчээ өгч таарна. Ойрын эх сурвалжийн хэлж байгаагаар бол Х.Баттулга, М.Энхсайхан нарыг ойр ойрхон уулзах болсон гэх. Энэ бол тэдэнд хамгийн боломжит хувилбар. 2016 оны сонгууль угтаад энэ мэт тоглолтууд явах болов уу.      Шуудхан хэлэхэд энэ байдлаа эртхэн засч Х.Баттулгыгаа аргадахгүй бол АН хоёр хуваагдаж мэдэх юм. Гэхдээ тэр хэний ч арганд орохооргүй шийдсэн болов уу. Өдгөө хүчтэй байгаа Х.Баттулга Н.Энхбаяртай харьцуулашгүй. Ядахад л Н.Энхбаяр шиг түүнийг шалгаж, барьж хориод тамлаад байхгүй. Хийх гэсэн улстөрөө зоргоороо амжуулна. Нэгэн цагт засаг тэргүүлж явсан шаггүй улстөрч гэгдэг М.Энхсайхан дээр нь нэмэгдэхээр АН-аас хүчирхэг бүлэглэл бий болгохыг хэн байг гэх юм бэ. Н.Алтанхуягийн суудалтайгаа зууралдсан арчаагүй байдал, хувийнх нь улстөр АН-ын хүчийг тарамдуулж хэн ч биш болгож мэдэхээр байна. Магадгүй, АН гэж нам устах эхлэл ч тавигдаж байж болох юм.

Эх сурвалж: Unen.mn А.Гал

– See more at: http://www.unen.mn/content/40174.shtml?alias=politics#sthash.UYmttcse.dpuf