Өнгөрсөн бямба гариг буюу энэ сарын 9-нд “П.Н.Шастины Нэрэмжит Улсын Гуравдугаар Төв Эмнэлэг”-ийн сувилагч бүсгүйн амь насанд хүрэх гэсэн ноцтой хэрэг гарчээ. Тодруулбал хэрэг гарсан өдрийн өглөөний 07:40 цагийн үед тус эмнэлэг рүү гаднаас хутга, заазуур барьсан нэгэн залуу орж ирсэн гэнэ. Улмаар шууд таван давхарт байрлах “Уушиг судлалын тасаг” руу явж орон ажлаа хийгээд зогсож байсан 29 настай Б гэх сувилагч бүсгүй болон түүнийг хамгаалахаар ирсэн залуугийн хүзүүн тус газар хутгалж хүнд гэмтээжээ.

Харин хутга барин улангасан дайрч байгаа залууг хүмүүс газар унагаан, хутгыг нь булааж авч чадсан бөгөөд цагдаагийнхан шуурхай ирж түүнийг авч явжээ.

Хутганд өртсөн хохирогч эмэгтэй Б ГССҮТ-д маш хүнд байдалтай хэвтэн эмчлүүлж байгаа аж. Харин сувилагч эмэгтэйг хамгаалах гэж байгаад хутганд өртсөн залуу Улсын клиникийн гуравдугаар эмнэлгийн Ерөнхий мэс заслын тасагт хэвтэн эмчлүүлж байгаа гэнэ. Хутга барин хүний аминд хүрэхээр завдсан энэхүү шалтгаан нь гэмт хэрэг үйлдсэн залуу ээжийгээ тус эмнэлгийн уушигны тасагт хэвтүүлнэ хэмээн авчирчээ. Гэтэл сувилагч бүсгүй Б “Ор байхгүй.Одоогоор хэвтүүлэх боломжгүй байна” гэх хариулт өгсөн юм байна. Үүнд нь бухимдсан өнөөх залуу өдөржин эмнэлэг дээр хэл ам хийж, өвчтөнүүдийн амгалан тайван байдал алдагдуулаад байсан тул сувилагч Б Баянгол дүүргийн цагдаагийнханд мэдэгдэж, түүнийг баривчлуулсан аж. Харин өнөөх залуу тэр өдөртөө суллагдаад, маргааш өглөө нь энэ аймшигт үйлдлээ хийсэн байна.

Ийнхүү тэрбээр ээжийг нь эмнэлэгт хэвтүүлээгүй, дээрээс нь өөрийг нь цагдаа дуудан бариулсанд өширхөн 29-хөн настай сувилагч бүсгүйн аминд хүрэхийг завджээ. Түүнийг БГД-ийн цагдаагийнхан саатуулан, шалгаж буй юм байна.

Хэдийгээр өш хонзонгийн сэдэлтэй хүний аминд хүрэхээр завдсан залуугийн буруу байж болох ч нөгөө талаас манай улсын эрүүл мэндийн салбарын хүнд суртал хэрээс хэтэрсэнд бухимдсан залуу ийм үйлдэл хийхэд хүргэсэн байж болох. Аль ч эмнэлэгийн эмч, сувилагч нар өвчтөн болон тэдний ар гэрийхэнтэй хүнд сурталтай, үл тоосон мэтээр харьцдаг нь нууц бишээ.

Эх сурвалж: Шуурхай.мн