Зөв гэдэг үгтэй уриатай “Хас” банк буруу зүйл хийжээ. Зээлдэгчтэйгээ нийлэн бусдын 11.5 сая төгрөгийг дансандаа хийлгэж аваад “залгиж орхиж”. БГД-ын 7-хороо, 66-9 тоотод суух Б.Нарангэрэл нь “Хас” банкинд хугацаа хэтэрсэн зээлийн өртэй байж. Тэрээр гадаадад зорчих хүсэлтэй иргэдэд уг банкан дахь дансанд нь түр мөнгө байршуулж банкны тодорхойлолт гаргахад туслалцаа үзүүлэх бизнес эрхэлдэг Ч.Баянмөнхийг хөөрхөн залилж орхижээ. Б.Нарангэрэл нь түүнд хандан Солонгос явах гэсэн тул визний тодорхойлолт гаргуулах шаардлагатай байна гэсний дагуу тэр хоёр харилцан тохироод 100 айл дахь “Хас” банкинд очжээ. Тус тооцооны төвийн теллер Б.Өлзий-жаргалаас Б.Нарангэрэлийн зээлийн данс асуудалтай эсэхийг асуухад “асуудалгүй, зээл байхгүй байна” гэж. Ингээд Ч.Баянмөнх нь тохирсны дагуу 11.5 сая төгрөгөө шилжүүлтэл Хас банк зээлийн өрөнд гээд шууд суутгаад авчихжээ. Бөөн хэл ам үүсэж. Ч.Баянмөнх нь “Банкны хуулийн дагуу надад үнэн зөв мэдээлэл өгөөгүй, өргүй мэтээр худлаа хэлж намайг төөрөгдүүлсэн” хэмээн гомдол гаргаж. Б.Нарангэрэлийн дансанд түр байрлах болохоос түүний эзэмшлийн мөнгө биш хэмээн буцаан өгөхийг шаардсан ч “Хас” банк эрс татгалзжээ. Харилцагчийн дансны мэдээллийг зөвхөн эзэмшигчийн бичгэн зөвшөөрлөөр өгдөг гээд гомдол гаргагч тийм зөвшөөрөл үзүүлээгүй гэж маргаж. Мөн Б.Нарангэрэл нь хугацаа хэтэрсэн зээлтэй, зээлийн гэрээнд дансанд байгаа мөнгөн хөрөнгөнөөс үл маргах журмаар төлөхөөр заасан тул зээлдэгч өрөө л төлсөн байна гэсэн гэнэ. Харин Б.Нарарнгэрэл нь “би Хас банкинд зээлтэй гэдгээ хэлсэн, тэр мөнгийг би аваагүй банк авсан” гэж өөрөөсөө зайлуулжээ. Ийнхүү овжин банк зальжин зээлдэгч хоёроос болоод нэг иргэн 11.5 сая төгрөгөөрөө хохироод байгаа гэнэ.

NUUTS.mn