Ерөнхийлөгч Ц.Элбэгдорж Үндсэн хуульд заасан бүрэн эрхийнхээ хүрээнд Засгийн газрын тухай хуулийн 20 дугаар зүйлийн 1 дэх хэсгийг “Засгийн газар Ерөнхий сайд, гишүүдээс бүрдэнэ. Зөвхөн Ерөнхий сайд Улсын Их Хурлын гишүүний ажил, албан тушаалыг хавсарч болно. Энэ тохиолдолд гишүүнийхээ бүрэн эрхийг хэвээр халдгална” гэж өөрчлөн найруулах, үүнтэй уялдуулан Монгол Улсын Их Хурлын тухай хуулийн зарим зүйлийн зохих заалтыг өөрчлөн найруулах хуулийн төслүүдийг санаачлан боловсруулж өргөн мэдүүлээд байгаа бөгөөд үүнийгээ “давхар дээл” тайлах хэмээгээд байгаа. Энэхүү улстөрчдийн үндэсний өв соёлоо хавчуулан, уландаа гишгэн “давхар дээл” тайлахыг уриалж буй жагсаал цуглаан нь Монголын түмэн олонд таалагдахгүй байгаа юм. Өнөөгийн улстөрчид давхар дээл битгий хэл, дан дээлээ ч өмсдөггүй байж “давхар дээл”-ээ тайлъя хэмээн жагсаал, цуглаан хийгээд байгаа нь МУГЖ С.Жавхлан болон Монгол улсаа гэсэн чин зүрх сэтгэлтэй олон түмнийг бухимдуулаад байгаа. МУГЖ С.Жавхлан сүүлийн долоо жил Монгол түмнээ үндэсний өв соёл болох дээлээ өмсөхийг уриалж, олон үйл ажиллагаа зохион байгуулсаар ирсэн. Гэтэл улстөрчид үүнийг дэмжихийн оронд бүр эсэргүүцэж “давхар дээл” тайлах тухай яригдаж буйд ундуйцаж байгаагаа С.Жавхлан илэрхийлээд байгаа. Тэрээр үүнийг эсэргүүцэж жагсаал цуглаан байгуулж, хэвлэлийн бага хурал хүртэл зарлаад авсан.

Хэдийгээр “давхар  дээл” тайлах хууль нь зөв боловч энэхүү хуулиа үндэсний өв соёлтой холбон илэрхийлж байгаа нь буруу юм. “Давхар дээл” гэхийн оронд “Давхар албан тушаал” гэх мэтээр нэрийдэж болох байсан зүйлийг ийн Монгол бахархал дээлтэйгээ холбожээ.

Монгол улсын алтан ургийн 37 хаан өмсөж ирсэн, дэлхий дээр дээлтэй Монголоор танигдаж яваа энэ сайхан өв соёлыг зүгээр нэг улстөрчдийн хэрэггүй хэрүүлд хавчуулан оролцуулж байгаад олон түмнийг бухимдуулж байгаа юм.

Энэ талаар МУГЖ С.Жавхлан Монгол Улсын Ерөнхийлөгч болон төр засагт хандан “Монгол дээлээ өмсч, хүндэлж мэддэггүй байж дан дээл, давхар дээл гэж үглэн, ам булаалдан ярих юм. Төрийн тэр хуульд нь дээл ямар хамаатай юм бэ. Монгол дээлийг ингэж гутааж, доромжилж болохгүй. Давхар дээл гэдэг үгийн оронд давхар ажил, давхар алба гэж хэлж болно шүү дээ. МАН-ын нөхдүүд тэр жагсаалынхаа үеэр яасан муухай дээл өмсөв өө? Наадмаар энэ хүмүүс нээх ганган хүмүүс явдаг шүү дээ. Энэ хүмүүст маш ганган дээлнүүд байдаг л байлгүй дээ. Монголын үндэсний өв соёлыг ингэж гутаан доромжилсныхоо төлөө энэ хүмүүс уучлал гуйх ёстой” хэмээсэн юм.

Мөн энэ үндэсний өв соёлоо гутаасан увиагүй үйлдэлийн эсрэг тэмцсээр байх болно, Монгол бахархалаа хамгаалсаар байх болно хэмээн хатуу хэлж байлаа.

Түүнчлэн Их аварга Д.Давгадорж мөн үндэсний дээлээ гутаан доромжилж байгааг эсэргүүцэн өөрийн цахим хуудаснаа “2016 оны сонгуулиар дээл өмсөхгүй байхыг чинь харъя л даа! Өөрсдийнхөө эрхэмлэн нандигнах зүйлийг ёс бусаар бүү хэл!. Дээл гэдэг бол Хөх толбот Монголчуудын эрхэмлэн нандигнан дээдлэх ариун нандин зүйл юм! Дээлээ тайл булган дээлээ тайл! та нар ер нь юу юм” хэмээн бухимдаж байсан юм.

Ямартай ч улстөрчдийн үндэснийхээ үнэт зүйлийг хавчуулсан энэхүү жүжиг олон хүнийг бухимдуулсаар байгаа нь харамсалтай.

Эх сурвалж: Шуурхай.мн