УИХ-ын чуулганы өнгөрсөн долоо хоногийн пүрэв гаригийн хуралдааны үеэр АТГ-ын дарга нарыг томилох асуудлыг хэлэлцэн шийдвэрлэсэн билээ. Хуралдаанд УИХ-д олонхын суудалтай хоёр намын гишүүд ихэд идэвхтэй оролцсон бөгөөд “ажлаа” тасалсан гишүүн бараг байсангүй. Харин ИЗНН-ын төлөөлөл болох С.Оюун, Д.Энхбат, тус намыг дэмжигч гишүүн З.Алтай нар хуралдаанд оролцсонгүй.

Энэ өдрийн хуралдааны өөр нэг содон зүйл нь хоёр намын лидер болох УИХ-ын гишүүн Х.Баттулга, С.Баяр нарын нууц яриа байв. Чуулганы хуралдаан эхлэхээс өмнө Х.Баттулга гишүүн намынхаа гишүүдийг тойруулан зогсоож байгаад ихэд чухал зүйлийг ярьж байгаа бололтой бөөгнөрөн зогсч байсан юм. Тэдний дунд УИХ дахь АН-ын бүлгийн дарга Ч.Сайханбилэг, З.Энхболд, Г.Батхүү нар нэлээд гол “рольтой” бололтой харагдсан. Харин хуралдаан эхэлмэгц Х.Баттулга сайд УИХ-ын гишүүн С.Баяртай өөд өөдөөсөө харан утсаар ярьж байснаа хоёул зэрэг босч, танхимаас сэмхэн гараад явчихав. Тэд С.Баярын өрөөнд орж, нэлээд удаан хугацаанд ярилцсан юм. Тэгснээ мөн л хамт танхимд орж ирсэн бөгөөд Х.Баттулга сайдыг ширээндээ      суумагц З.Энхболд гишүүн ирж, юу ч юм нэгийг өрнүүлж байв. Гэхдээ энэ нь С.Баяртай уулзсан асуудалтай холбоотой гэж батлах аргагүй.

Ямартаа ч хоёр намын лидерүүд ямар нэг яриа эсвэл тохироо хийгээд байгаа бололтой. Чухам юуг ингэж идэвхийлэн ярилцаад байгаа юм бол?

Т.ГЭРЭЛ