“Женко” Х.Баттулгын толгойлдог Ардчилсан холбоо хөдөлгөөнд орж, орон даяар гишүүнчлэлээ сэргээн, үнэмлэхээ шинэчлээд эхэллээ. Аль ерээд онд үнэмлэх аваад сураг алдарсан нөхдийг дуудаж байгааг ч эх сурвалж хэлэв. Тэр ч бүү хэл зарим партизануудад байр орон сууц өгсөн сураг ч дуулдана. Үүнтэй зэрэгцээд Х.Баттулга ямар нэгэн хөдөлгөөн хийх нь гэсэн хар хэнд ч бууж таарна. Өнгөцхөн харахад Ардчилсан холбоог хүчирхэгжүүлж, Засгийн эрхийг булаах төлөвлөгөө мэт харагдана. Бүр наандаж харвал ойн хүрээндэх ажил мэт харагдана. Гэвч алсдаа Х.Баттулгын “Монгол Улс” гэсэн компани байгуулах хэтийн төлөвлөгөө хэрэгжиж байхыг ч үгүйсгэх арга алга. Өөрөө ч “Монгол тулгатны зуун эрхэм” нэвтрүүлэгт орохдоо Сингапур, Малайз гэх мэт хөгжингүй орнуудын загварыг яриад ерөөсөө л компанийн системээр ажиллаад босчихсон. Манайх болохгүй зүйл үгүй хэмээж байв. Х.Баттулгын энэ ажиллагаа эртнээс эхтэй. Тухайлбал, хамтарсан Засгийн газарт ЗТБХБ-ын сайдаар ажиллаж байхдаа “Шинэ төмөр зам” төслийг эхлүүлсэн. Үүний гэрээг өнөө хүртэл тэр өөртөө хадгалсаар байгаа. Яг л өндгөө дарсан элээ шиг харамлаж байгаа, бусдаас. Уг нь зүй ёсоор энэ төсөл өдийд яваад эхэлчихсэн байх учиртай. Бүр цаашлуулж бодох юм бол үр ашгаа өгч эхлэх учиртай. Гэтэл Х.Баттулга өөрийнхөө хувийн зүйл шиг бусдаас харамласаар байгаад Монголын нүүрсийг үнс болгож байна. Тодотгож хэлбэл, Монголын эдийн засаг унаж байгаа нь Х.Баттулгатай туйлын холбоотой.
Яагаад дараад байгаагийн учир нь өөрөө эрх мэдэлд гарч, өөрөө хийх гэсэн л санаа. Өнөөх “Монгол Улс” компани байгуулах төлөвлөгөөний гол цөм нь “Төмөр зам” төсөл юм. Дараагийн нэг томоохон зүйл бол “Майдар” төсөл. Үүний дараагийн төсөл нь “Жудогийн ордон” барих. Ийм гурван том төсөл байгуулж, “Монгол Улс” компани байгуулах санаархал нь боломжийн сайн хэрэгжиж байна. Гурван том төслийг хувааж аваад үзье. “Майдар” төсөл бол мэдээжийн хэрэг сүсэгтэн олонд барих түүний бэлэг. Үүгээрээ тэр массыг татаж чадна гэдэгтээ итгэлтэй байгаа. Яагаад гэхээр монголчууд бид чинь шарын шашинт сүсэгтэн түмэн шүү дээ. Үүнийг тэр олж харсан хэрэг. “Шинэ төмөр зам” төсөл бол Монголын эдийн засгийг сэргээх гол цөм. Үүгээрээ тэр нийт түмэнд татагдах төдийгүй. Улстөрийн тавцанд нугарч хугаршгүй өндөр авна. Өнө удаан төрийн өндөрлөгт байх төлөвлөгөө юм. “Жудогийн ордон” бол тэр чигээрээ массыг татах бөгөөд спортын түүхэнд алтан үсгээр тэмдэглэгдэн үлдэх том төсөл. Зөвхөн үүгээр ч зогсохгүй Азийн хэмжээнд нөлөөлөл тогтоох томоохон төсөл мөн. Ингээд л Х.Баттулга төрийн эрхэнд гарч, ёстой өөрийнх нь хэлснээр “Монгол Улс” хэмээх компаниа байгуулаад авна даа. Түүнээс биш бидний төсөөлж байгаа шиг хоёрхон жил Ерөнхий сайдын суудалд залрах сонирхол түүнд байхгүй биз.

Өөрөөр хэлбэл, тэр Н.Алтанхуягтай ноцолдохгүйгээр ээлжээ хүлээхээр шийдсэн хэрэг. Тэгэхээр Н.Алтанхуяг суудлаа алдахаас айх хэрэггүй, өнөөдөртөө. Нөгөө талаар Х.Баттулга Н.Алтанхуягийн ажиллаж байгааг хараад хөх инээд нь хүрч суугаа. Үнэхээр арай ч дээ гээд толгой сэгсэрч суугаа. Би байсан бол хэмээн халаглаж байгаа. Гэхдээ “Монгол Улс” компани байгуулах төсөл хэрэгжихэд ихээхэн саад учирна. Эхлээд нам дотроо ойлголцох хэрэгтэй. Ойлголцохын тулд тэр фракцаа хүчирхэгжүүлэх хэрэгтэй. Тиймийн тулд Ардчилсан холбооны гишүүд дэмжигчдийн хүрээг тэлэх ажиллагаагаа ийнхүү хийж байгаа хэрэг биз ээ. Н.Алтанхуяг шиг “Алтангадас” чигт зөвхөн ханд хаяад бусдыгаа мартдаг байж болохгүй. Үүний дараа тэр улстөрийн намуудтай ойлголцох хэрэгтэй болно. Тэр тусмаа улстөрийн ууган хүчинтэй ойлголцох нь түүнд тийм ч амар биш. Бусад намуудтай ч эв хамтын гэрээгээр ажиллах болно. Энэ бүгдийг давж гэмээнэ “Монгол Улс” компани байгуулах ажиллагаа саадгүй хэрэгжих байх.

С.Баяр
Эх сурвалж: