Ерөнхий сайд маань ар­лын Японыг зорин нисээд явчихлаа. Ерөнхий сайдын ху­виар дэлхийн хүчирхэг гү­рэнд албан ёсны  анхны томоохон айлчлал хийж бай­гаа нь энэ байх шүү. Айлч­лалынх нь зорилго эхнээсээ тодорхой болсон.

Дэлхийн зах зээл дээрээс эхний 1.5 тэрбумыг нь босгож ирээд зас­мал болон төмөр замын аж­лаа эхлүүлсэн “Чингис бонд”-оо дахин 500 сая тэ­гэхдээ Японы иенээр цэ­нэг­­лэхээр Н.Алтанхуяг сайд маань ийнхүү яаравч­лан мордсон хэрэг.

Эдийн засгийн хөгжлийн сайд Н.Батбаярын  бахархан тэм­­­дэглэснээр “Чингис бонд”-ын гуравны нэгийг л одоо­гоор үрчихээд байгаа ч зөвхөн бүтээн байгуулалт бо­­лон нэмүү өртөг шингэсэн үйлд­вэрлэлийг дэмжихэд зо­риулан санхүүжилт хийсэн юм байх.

Харин төсвийн алдагдлыг нөхөх болон нийгмийн ха­ламжийн  салбарт  ганц   төг­­рөг ч хялайлгаагүй гэнэ. Таван толгойгоос урд хил хүрэх төмөр зам, зур­гаан аймгийн төвийг Улаан­баа­тар хоттой холбох хатуу ху­чилттай зам, Улаан­баа­тар хотын 33 уулзварыг томс­гох төсөл, Баян­зүрхийн тов­­чоо­ноос 22-ын товчоо хү­рэх 33 км  хатуу ху­чилт­тай замын  ажил гээд “Чингис бонд”-ын мөнгөөр овоо далайцтай хэдэн ажил эхлүүлжээ.

Түүнчлэн Таван толгой, V цахилгаан станцын ажлыг бас л “Чингис бонд”-оороо санхүүжүүлж ажил хэрэг болгосноор Монгол Улс эр­чим хүч импортлогч бус экспортлогч орон болно гээд байгаа.

Хэрвээ цахилгаан эрчим хүч экспортлогч орон болж  хойд хөршөөс эр­чим хүчний хамааралгүй бол­чих аваас “фортуна” Н.Бат­баяр сайдын алтан хө­шөөг Улаанбаатарын төвд сүндэрлүүлсэн ч  багадна.

Н.Батбаяр сайдын тайл­барласнаар төмөр зам, зас­мал зам, орон сууцны томоо­хон хорооллууд гээд энэ зэр­­гийн томоохон бүтээн бай­­гуулалтын ажлуудыг сан­­­хүүжүүлсэн ч  “Чингис бонд”-ноосоо зөвхөн гуравны нэ­гийг нь л үрсэн нь үнэн бол “браво” гээд хоёр гараа хорс­тол алга таших хэрэгтэй юм.

Талдаа ч ороогүй “Чингис бонд”-ын ам.долларууд Мон­­гол­­банкинд тоо ёсоороо хадгалагдаж байгаа нь нот­­­логдвол Н.Алтанхуяг сай­­­дыг мөнгөө баруун, сол­гой­­­гүй цацаж, үрэн таран хий­­­чихээгүйд нь талархаж дээш нь шидэж халуун баяр хүргэх ёстой шүү, та минь ээ.

Хэдийгээр төсвийн ор­лого 222 тэрбум төгрөгийн алдагдалтай,  ам.доллар 1700 гараад  явчихсан таа­руу­­­хан  үзүүлэлттэй  байгаа ч Ерөнхий сайд маань “Монгол Улсын эдийн засаг хэвийн байгаа. Инфляци өсөөд байгаа юм алга.

Сэтгэл зовоогоод  байх  зүйл   одоогоор ажиг­лагдахгүй байна” хэ­мээн тайлбарлаж нүүр дүү­рэн мишээл тодруулаад л яваа. Гэхдээ төсвийн алдаг­дал энэ байдлаар үргэлжлээд байвал оны эцэст 1.5 их наяд төгрөгт хүрч сөрөг дээд амжилт  тогтоож  ч бол­зошгүй.

Ерөнхий сайдын санаа­чилсан зарлага, сан­хүү­жил­тээ оновчтой болгох, үр­гүй зардлыг дээд зэргээр бууруулах, нөөц бололцоогоо  шавхан дайчлах арга замаар төсвийн алдагдлыг 500 тэр­бум төгрөгөөр бууруулж чад­вал түүний танхимаар орол­дох  олиггүй этгээдүүд ол­дохгүй л болов уу.

Ямартай ч 500 тэрбумын хэмнэлт гаргах дүр зураг харагдаж байгаа ч 2013 оны Монгол Улсын төсвийн орлого 950 тэрбумаас нэг их наяд төгрөгөөр тасрах нь тодорхой болоод байгаа.

Ийм базаахгүй байдал үүсээд байхад ч Сангийн сайд Ч.Улаан  “Хөрөнгө оруу­лалтын зардлыг 500 ор­чим тэрбум төгрөгөөр, га­даадын зээл ашиглалтын түв­шин буурч байгаатай холбоотойгоор төлөвлөсөн хэм­жээний зардлыг 170 ор­чим тэрбум, урсгал зардлыг 300 тэрбум төгрөгөөр буу­руу­лахаар төлөвлөж бай­гаа” хэмээн мэдэгдэж, тан­химынхаа тэргүүнтэй адил­хан хэнэггүй царайлаад л яваад байгаа.

Төсвийн алдаг­дал ДНБ-ий 10 хувьд хүрч болзошгүй нөхцөл үүсээд байгаа ч Ерөнхий сайд Н.Алтанхуяг “Тийм юм байхгүй. Тайван амгалан байцгаа” гэж мэдэгдчихээд Япон руу нисээд явчихсан. Одоо арлын Японы Ерөнхий сайдтай хундага тулгангаа 500 сая ам.долларыг иенээр босгож ирэх гэрээнд гарын үсэг зураад чухам завгүй яваа.

“Чингис бонд”-ын 1.5 тэрбумаас 500-хан саяыг нь үрж энэ зэргийн ажил эхлүүлсэн шинэчлэлийн Зас­гийн газар мандтугай.

Хэрвээ “Чингис бонд”-ын нэг  тэрбум  ам.доллар Монгол­банкинд тоо ёсоо­роо байж  байгаа бол Н.Алтанхуяг сайдыг Монгол Улсын Хөдөлмөрийн баа­тар болгож алтан таван хо­шуугаар шагнавал зохино.

Хотын дарга Э.Бат-Үүл улсын баатар болсон юм чинь “Чингис бонд”-ын мөнгөө арвилан хэмнэж, энэ зэргийн бүтээн байгуулалтын ажил өрнүүлсэн Н.Алтанхуяг сай­дыг баатар болгож яагаад болохгүй гэж. Та минь ээ, “Чингис бонд” талдаа ч ороо­гүй бүрэн, бүтэн байгаа гэнэ шүү. Ингэж нэг санаа амрах гэж байх уу даа.