Монгол Улсын гавъяат тамирчин  У.Мөнх-Эрдэнэ өчигдөр өөрт нь шударга бус хандаж байгаа тухай сэтгүүлчдэд мэдээлэл хийсэн. Тодруулбал, тэрээр ирэх 10 сард болох гэж буй Казахстаны Алма-Ата хотод болох ДАШТ-д оролцохоор бэлтгэл сургууль хийж байгаа ч энэ тэмцээнд оролцох эсэх нь тодорхойгүй болжээ.

Учир нь Боксын холбоо УАШТ-д түрүүлсэн нь оролцох ёстой гэсэн байр суурьтай байгаа бол олон улсын жишгээр чансаагаараа тэргүүлж байгаа нь оролцдог аж. Иймд Боксын холбооны зүгээс У.Мөнх-Эрдэнийг 64 кг-ийн жинд З.Энхзоригтой сорилго хийж, хэн нь ирэх ДАШТ-д зодоглохоо газар дээр нь шийдэх хүсэлт тавьсан ч МУГТ У.Мөнх-Эрдэнэ татгалзсан байна.

УАШТ-д З.Энхзориг тэргүүлж олон улсын хамтарсан бэлтгэлдээ явж бие физиологийн хувьд бэлэн болсон байгаа бол чансаагаараа тэргүүлж буй У.Мөнх-Эрдэний хувьд со­рилго хийхэд хангалттай хугацаа, бэлтгэл дутаж байгаа гэнэ.

У.Мөнх-Эрдэнэ хэлэхдээ “Оюутны тэмцээнээс медаль авсан хүнтэй намайг сорилтод ор гэж байна.Тийм юм байхгүй. ДАШТ болох гээд, формдоо орох гэж байгаа үед ийм юм яриад байж болохгүй. Улсын аварга болсон гээд л дураараа загнаад… Би Монгол Улсын аварга 10 удаа болсон. Ийм зүйлийг надтай зүйрлүүлээд байгаа нь сонин байна. Сая Универсиад наадамд Орос, манай хоёр л мэргэжлийн боксчдоо илгээсэн. Бодоод үз, оюутныг ялсан тамирчинтай сорилго хийнэ гэж үү. Би хийхгүй” гэсэн юм.

Эх сурвалж: Шуурхай.мн