Хэр баргийн кинонд тоглохгүй хэмээн хээвнэг ярих дуртай “Харанга”-ын Лхагваа бөө болоод хэдэн жилийн нүүрийг үзэж байна. Түүний бөөгийн багш Эрдэнэт хотод амьдарч байсан бөгөөд хэдэн сарын өмнө бурхан болсон гэдэг. Лхагваа багшийнхаа гэгээн дурсгалыг хүндэтгэж сүүлийн үед омогшил дүүрэн дуунуудаа сэтгэлд хүртэл дуулж байгаа нь туулж өнгөрүүлсэн амаргүй хувь заяаных нь эрхээр тун амьдралтай сонсогдож байгаа нь энэ бүхэнтэй холбоотой юм. Аялгуу сайхан дуугаа дуулахдаа микрофондоо таван өнгийн хадаг зүүж, тэв тэнгэрээ шүтэж, онгод юугаа дуудан олныг уяртал дуулдаг онцгой содон хоолойтой дуучин маань хар тамхины хэргээр шоронгийн хаалга татаагүй бол аль хэдийнэ Гавьяат болчих нэгэн байлаа.

Х.Лхагваа Эрдэнэтэд амьдарч байсан бөө багш дээрээ очиж номын дуу сонсч хэд хонохдоо гар хумхин суулгүй өөртөө зориулж модон жорлонгийн суултуур хийчихсэн тав тухаа бодон чамгүй мужаан болохоо харуулсан гэдэг. Дуучин хүн гэхээр л дуулахаас өөр юм хийж чаддаггүй гэдэг шиг худлаа юм үгүй. Сүүлийн үед манай дуучдаас “Номин талст”-ын Д.Батсүх, Б.Амархүү, “Камертон”-ы Д.Болд зэрэг хүүхэд, залуусын шүтэн биширдэг олон од кинонд тоглох нь нэг ёсны моод болоод байна. Хайртай дуучныхаа тоглосон киног үзэхийг хүссэн хүслийн цаана киноны бизнес жинхэнэ утгаараа цэцэглэж байгаа юм. Тиймдээ ч элдэв шалдав болсон, болоогүй кинонд тоглож онигоонд орохоосоо “Харанга”-ын Лхагваа ичсэн бөгөөд нөгөөтэйгүүр бөө болсон нь ч үүнд чамгүй нөлөөлсөн бололтой.
Ө.Хэмх (www.wikimon.mn)