“Нарантуул” худалдааны төвийн хүнсний захад өнгөрсөн баасан гаригт гал гарч түрээслэгчдийн хүнсний бараа бусад бараа материал шатсан.Энэ хэрэгт Баянзүрх дүүргийн Цагдаагийн I дүгээр хэлтсийн Хэрэг бүртгэх, мөрдөн байцаах тасгийн ахлах мөрдөн байцаагч, цагдаагийн ахмад Б.Ганбаатар эрүүгийн хэрэг үүсгэн мөрдөн байцаалтын ажиллагаа явуулж, хяналтын прокурор Л.Батгэрэл, Н.Дамдинсүрэн нар хяналт тавин ажиллаж байна.

Одоогийн байдлаар энэ хэрэгт холбогдуулан долоон хүнийг сэжигтнээр тооцон цагдан хорьж, 16 хүнийг хохирогч, иргэний нэхэмжлэгчээр тогтоон байцаалт авч, гал гарч байсныг харсан гэрчүүд болон “Нарантуул” ОУХТ-ийн удирдлагууд, менежер, зохион байгуулагч, ажилчид зэрэг гэрчүүдийг байцаах зэрэг мөрдөн байцаалтын шаардлагатай ажиллагаануудыг цаг алдалгүй шуурхай явуулж байгаа аж.

Одоогоор хэргийн газрын үзлэг явуулж байгаа боловч галд хамрагдсан обьектийн талбайн хэмжээ том, агуулахад хохирогчдын маш их хэмжээний бараа байгаа бөгөөд түүнийг тоолох, хохирлыг тогтоох зэрэг ажиллагааг явуулж байгаа тул хэргийн газрын үзлэг үргэлжилж байгаа юм байна.

Эх сурвалж: Шуурхай.мн