Улаанбаатарт таксины олон компани байдаг, шинээр  ийм төрлийн компаниуд үүдээ нээж байгаа гэх ч өглөө, оройн цагаар такси барина гэдэг ёстой ховрын бараа болжээ. Зам дагуу гараа өргөн зогсох хичнээн ч хүмүүс байгаа юм, бүгд л арга нь барагдсан байдалтай дэмий гараа гозгонуулна. Залуус, идэр насныхан бол яая гэхэв, алхаад явна биз. Настнууд, хүүхдээ тэвэрсэн эхчүүд зам дээр удаан зогсож байгаа нь харагдах юм. Гашуун утаа, хүйтэн жавар бүхий өвлийн өдрүүд эхэлж байна. Тиймээс машинтай хүмүүст нэгэн зүйлийг захих гэсэн юм.

Та ажил төрөлдөө явахдаа такси хүлээж гараа чилээн зогсоо хүүхэдтэй эхчүүд, настнуудыг аваад яваач. Зам дагуу бол хүрэх газрынх нь ойролцоо буулгачихна биз. Мөнгийг нь авсан ч болно, буян санаад авахгүй байсан ч таны дур. Ингэж чадвал хичнээн олон хүнд тус болж, танд тэд чин сэтгэлээсээ баярлах болно. Хүн баярлуулах сайхан шүү дээ. Таны төлөө гэсэн тэдний сайхан сэтгэл, сайны ерөөл ажил үйлсэд тань ч сайнаар нөлөөлж мэднэ. Чин сэтгэлийн ерөөл хүнд дандаа эерэг сайхан мэдрэмж төрүүлж байдаг шүү дээ. Зөвхөн өвлийн улиралд л ингээч гээд хүсээд байгаа юм. Такси болооч, гуйя.

Д.ОЮУНТУЯА