Улаанбаатар хотод өнөөдрийн байдлаар 3000 орчим лифт ажилладаг гэсэн судалгаа байдаг аж. Гэтэл сүүлийн үед шинээр баригдаж байгаа орон сууцуудын лифт гацах, унах зэргээр иргэдийн эрүүл мэндэд хохирол үзүүлэх болсон талаар гомдол их ирэх болсон байна. Тиймээс бүх лифтийг шалгаж, ашиглалтын хугацаа, баталгаа зэргийг тодорхойлж пайзжуулах ажил хийхээр болжээ.

Тодруулбал, Шударга өрсөлдөөн хэрэглэгчийн төлөө газар, “Улаанбаатар цахилгаан шат” нийслэлийн өмчит компанитай хамтран Улаанбаатар хотын орон сууцуудад ашиглаж буй цахилгаан шатанд шалгалт хийж эхэлсэн талаараа мэдээллээ.

Уг шалгалт нь энэ сарын 16-наас эхэлсэн бөгөөд арваннэгдүгээр сарын 15 хүртэл үргэлжлэх аж.Шалгалтаар одоо ашиглагдаж буй цахилгаан шатнуудын нэгдсэн тоог гаргах, ашиглалтын хугацаа, аюулгүй байдлын дүн шинжилгээг хийж чанар, стандартын шаардлага хангахгүй байгааг нь ашиглалтаас хасах төдийгүй бүх цахилгаан шатуудыг өөрийн мэдээлэл бүхий мэдээллийн самбаржуулах юм байна.

Энэ талаар “Улаанбаатар лифт” НӨҮГ-ын дарга Г.Ангар хэлэхдээ “Ашиглагч байгууллагаас лифтний марк, даац, хурд, магадлал, хийсэн огноо зэргийг шаардана. Лифт нь хэдэн оны, хэдэн сарын хэдэн хүртэл ашиглагдана гэсэн пайзыг хадах юм. Нэг ёсондоо иргэдэд баталгаа өгч байна гэсэн үг. Тэгэхээр иргэд лифтэндээ орохдоо лифтнийхээ талаарх мэдээллийг бүрэн авах юм.Улсын төсвөөс шат дараатайгаар хөрөнгийг нь шийдвэрлэснээс шинэчлэлийн ажлууд хийгдээд 50 хувьтай явагдаж байна. 2016 он хүртэл улсын төсөвт нийт 13 тэрбум төгрөг төсөвлөсөн байгаа. Нийтдээ 400 гаруй лифт шинэчлэгдэнэ. Өнгөрсөн жил 133 лифтийг 5.5 тэрбум төгрөгөөр шинэчилсэн. СӨХ-ны дээд зөвлөлөөс гаргаж өгсөн нэрсийн дагуу шинэчлэлийн ажил хийгддэг” гэлээ.

Эх сурвалж: Шуурхай.мн