Сүүлийн үед иргэдийнхээ, ард түмнийхээ төлөө “ажиллана аа” хэмээн сонгогдож ажиллах болсон эрхмүүдийн нууц дансууд илрэх болоод буй. Тэдний нэгээр байгаль орчны сайд асан, Худалдаа үйлдвэрийн яамны дэд сайд асан У.Барсболд  тодров бололтой.

Монгол улсын стратегийн ордод багтаахаар зүтгүүлж буй “Хөшөөт”-ийн уурхайгаас хөлжсөн гэгддэг У.Барсболдын оффшор бүс дэх 2006 оны 4 дүгээр сарын 28-нд Их Британий Виржинийн  аралд  Mongolian Natural Resources Investment Group /BVI/ company limited компанийг бүртгүүлэн, нээсэн нууц данс нь илэрчээ.

“Оффшор” компани гэдэг бол эзэн нь тухайн улс орон, бүсэд амьдардаггүй ч компани байгуулж бизнес эрхлэхийг хэлдэг. “Оффшор” бизнес бол хууль бус үйлдэл биш бөгөөд аль ч улсад хэн ч байгуулж болдог юм. Харин дэлхийд татварын маш таатай орчин бүрдүүлж, маш бага хэмжээний хураамж тогтмол төлж бизнес эрхэлж болдог орчинг Британийн Виржинийн арал, Кэйманы арал, Люксембург, Кипр, Хонг Конг зэрэг олон орон, бүс муж бүрдүүлсэн байдаг байна.

Энэхүү компанийг бүтгүүлэн, дансаа нээсэн он нь Хөшөөтийн хятад эзэдтэй ч холбоотой байх гэх хардлагыг төрүүлэх болов. Учир нь 2006 онд Хятад болон Хонконг дамнан авлигын сүлжээ үүсгэн онц их хэмжээний хөрөнгө мөнгө шамшигдуулдаг бүлгийн толгойлогч гэдгээрээ алдартай Лю Ай Данг Хөшөөтийн хувьцаа эзэмшигчээр тодорч байсан юм.

Эх сурвалж: Шуурхай.мн