Тэр ард түмнээс хулгайлсан, зувчуулсан, хумсалсан. Монгол Улсын нэрийг зарсан, идсэн, өмлөсөн. Одоо үүнийгээ худал гэх юм бол тэр жинхэнэ шийдсэн луйварчин. Харин түүнийг өмөөрөгсөд Монголын ард түмний өмнө нүглийн нүдийг гурилаар хуурагсад болох учиртай.

Өнөөдөр Монгол Улсын төрийн эрх барих дээд байгууллага УИХ-ын эрхэм гишүүд яг ийм хэрэг үйлдчихлээ. Тэдний өмөөрөөд байгаа этгээд санхүүгийн луйвраар олсон мөнгөө оффшор бүсэд нууж байсныг нь олон улсын сэтгүүлчид илрүүлж, дэлхийгээр нэг Монголын нэрийг муугаар дуудуулсан. Дуудуулахдаа бас булайгаа чирсэн нь Швейцарийн банкинд данс нээлгэхдээ өөрийгөө хятад хүн гэж тодорхойлсонтой холбоотой. Нээрээ эрлийз байж мэдэх нөхөр шүү гэх хардлага тэгэхэд Монголоор нэг тархсан.

Харин хийсэн хэргээ хүлээж, түмний өмнө гөлөлзөж байсан С.Баярцогтын царай одоо ч нүдэнд харагдаж байна. Олны гэсгээлээс нуугдах аргагүй болсондоо цус харвах дөхсөн тэрбээр “Би хариуцлага хүлээхэд бэлэн” гэж байсныг бүгд санаж байгаа. Өөрөөр хэлбэл “Би хариуцлага хүлээхгүй, хэрэг хийгээгүй” гэж хэлээгүйг нь гэмээ хүлээсэн гэж шууд ойлгож болно. Тэгээд одоо хариуцлагаа хүлээхгүй, юундаа тойрч зугтаад байгаа юм.

Харин Монголын төр энэ цайрсан луйварчныг өнөөдөр “нэр төртэйгөөр” хаацайлж, ардаа нуух гэж оролдов. Даравч дардайна гэдгээр парламентын ард нуугдаад ч далд орохооргүй цайрсан хүн дээ. Уг нь хэрэг хуучирдаггүй гэдэг хатуу үнэн бий хэдий ч УИХ-ын эрхмүүд хорвоогийн энэ хуулийг зөрчиж буйгаа зарлаадахлаа. Үүнийг эх орноосоо урвасан, ард түмнээс нүүр буруулсан, дэлхий нийтийн өмнө Монголыг ичээсэн хэрэг гэхээс өөр арга байхгүй. Үнэн нь л ийм юм.

С.Баярцогтын нэрээр цоллогдох хэргүүд тэр Швейцарийн банкин дахь нууц данс, хөрөнгө орлогын мэдүүлгээс тас нуусан, ямар хөрөнгөөр байгуулсан нь мэдэгдэхгүй ашиг өндөртэй хувийн компаниар дуусахгүй. Сэлэнгийнхний итгэлээр хөөрхөн тоглож, Монголын улс төрийн суудалдаа барьцалдаж үлдсэн энэ хүн АН Засгийн эрхэнд гармагц хошуу цорвойлгож байгаад зүгээр өнгөрнө гэсэн хардлага үнэн болж хувирсан нь харамсалтай.

Уг нь С.Баярцогтын гэх хавтаст хэрэгт Оюутолгойн гэрээний луйвар тэргүүн эгнээнд бичигдэх ёстой. Монголын ард түмнийх гэдэгтэй хэн ч маргахгүй энэ баялгийн 66 хувь нь гадныхны мэдэлд очсон. Оюутолгойн экспорт эхэлсэн ч 68 жилийн дараа л Монгол Улс сая нэг юм ашиг хүртэж эхлэх гэрээний эзэн этгээд гээд түүнийг УИХ-ын гишүүнээс түдгэлзүүлэх байтугай, хар гэрт залармаар хэргийг тоочихоос огиудас хүрэм.

УЕПГ-аас С.Баярцогтыг суудлаас нь ховхлох хангалттай нотолгоо бий гэж үзэн УИХ-д бичиг хүргүүлэхэд манай парламент үүнийг хянан үзсэний дүнд “Яг хэрэг хийснийг нь хэн харсан юм” гэх ухааны хариулт хэлж өмөөрчээ. Эрх нь дэндэж, том болохоороо шоронгийн хадаас болчих гээд байгаа мангар пацаанаа өмөөрч байгаа тэнэг аав, ээж шиг.

Энэ нөхөр нэг хэсэг овоо таг чиг болж, чих муу зүйл сонсохгүй амарч билээ. Гэтэл харин Ерөнхийлөгчийн сонгуулийн ялалтын уухай хадаж амжаагүй байтал байдгаараа алгаа ташчихсан гэнэт гараад ирсэн. Ёстой цочсон гэж. Иргэдийн дийлэнхийн саналыг авч, Монгол Улсын Ерөнхийлөгч хэмээх алдрыг хоёронтоо хүртсэн хүний алдрыг бараантуулах гэсэн шиг хэвлэлийн бага хурал, албан мэдэгдэл, тангараг өргөх ёслол гээд олон цугласан газар бүрт үзэгдэх болсон.

Хамгийн сүүлд Ерөнхийлөгчийн тангараг өргөх ёслол дээр баяссан царайгаа нууж чадахгүй, хөл нь газар хүрэхгүй шахам дэгдэгнэж зогссон түүнийг хүмүүс “Эсгий хийх газар нохой хэрэггүй” гэгчээр энд юугаа хийж яваа юм гэцгээж байв.

Шууд хэлэхэд С.Баярцогт гэх хүн улстөрчийн хувьд хүүр болов. Одоо дүрдээ овоо сайн тоглочихдог нэг луйварчин байсан гэх цаг холгүй. Түүнд шантаажны улс төр, ард түмнээс цусалсан адилхан луйварчингуудаа элэг барихаас өөр зүйл үлдээ болов уу.

Д.Амар

Эх сурвалж: Bataar.mn

Үүнээс илүү гоё мэдээ уншихыг хүсвэл LIKE дараарай