Өчигдөр МАХН-ын дарга Н.Энхбаярын гэрт АТГ-аас нэгжлэг хийж эхэлсэн. Тэрээр өдгөө нэгдсэн хоёрдугаар эмнэлэгт байгаа. Гэхдээ Н.Энхбаярын эхнэр О.Цолмон АТГ-аас дуудсан цагт нэг ч удаа очиж мэдүүлэг өгөөгүй гэнэ.

Түүнчлэн өчигдөр АТГ-аас тэдний Удирлагын академийн урд байрлах гэрт 11 цагаас хойш нэгжлэг хийж мэдүүлэг авсан гэх бөгөөд оройн 22 цаг орчимд дууссан байна. Ямартаа ч өчигдөр намын нөхөд болоод хэвлэл мэдээллийнхэн гэрийнх нь гадна хууль хяналтынхныг явтал байсан аж. Учир нь ямар ч хүнийг дотогш нэвтрүүлээгүй хууль хяналтын ажилчид хаалгыг манан зогссон байв.

Мөн өчигдөр О.Цолмонтай хамт гэрт нь байсан эгчийнх нь хүүг баривчилсан ажээ. МАХН-ын гишүүн, хуульч Л.Эрдэнэтуул “Хууль хяналтын байгууллагынханд эрх нь байгаа ч прокурорын зүгээс авсан нэгжлэг хийх тухай бичиг баримтаа үзүүлэхгүй байна. Төмөрийн гэрт нэгжлэг хийсэн гэж байгаа. Үнэндээ бол Э.Батшугар, Т.Даариймаа нар гэрлэлтээ баталгаажуулаагүй байхад ийм үйлдэл хийсэн нь бүдүүлэг үйлдэл” гэж хэлж байгаа юм.

Мөн тэдний гэрээс оройн 20.00 цагийн үед цагдаагийнхан том ногоон хайрцагтай зүйл гаргаж, 9505 УБД улсын дугаартай машиндаа хийснийг МАХН-ын гишүүд дэмжигчид харжээ. Зарим нь тэдний хойноос “Том ногоон хайрцагт О.Цолмонг хийгээд явчихлаа. Дотор нь юу байгааг шалгах ёстой байсан юм” гэж орилсоор хоцров.

Харин ийнхүү гэрт нь нэвтрэх болсон шалтгааныг Т.Билэгтийн мэдүүлгээс болсон гэх ч яриа байна. Харин ямар шалтгааны улмаас ийнхүү гэрт нь нэвтрэх болсныг албан ёсны тайлбар өгөх хүн, албан тушаалтан одоогоор алга байгаа юм.

Эх сурвалж: Шуурхай.мн