Өглөө нь бодьсадва болж хүмүүн олонд өглөг буянаа түгээн хүн амьтан эдгээн, эелдэг дуу хоолойгоор дуулан хуурддаг хумшин бодьсадва байдаг гэнээ. Тэр нь үдэш болхоороо хөлийн арван хуруу нь хөдөө тийшээ махийж, гарын арван хумс нь гадаа тийшээ сарайсан уул хадыг хэмх хазсан, ургаа модыг суга шидсэн хүн амьтан хүйс тэмтэрсэн хөрст дэлхийн гай түйтгэр болдог үлгэр бишгүйдээ л байдаг. Энэ үлгэр яг л одоо МАХН-МАН-ын хооронд болж байна.
Нэгэн жишээ.
Н.Энхбаяр ХЗДХ-ийн сайд Ц.Нямдоржийг “баруун солгойгүй” балбаж байхад түүний мэдлийн “Зууны мэдээ” сонин Шүүхийн шийдвэр гүйцэтгэх ерөнхий газрынханд мэндчилгээ дэвшүүлсэн зайг Ц.Нямдорж сайдад харамгүй гаргаж өгч байх жишээтэй.
Бас нэгэн жишээ.
М.Энхболд болон түүний нөхдийн, МАН-ын бага хурлын гишүүдийн мэдлийн гэгддэг TV8, UBSTV, ТМ, TV5,  зэрэг телевизүүдээр С.Батболдыг огцруулах 9 гишүүний ярилцлага, шууд нэвтрүүлэг, мэтгэлцээнүүд Н.Энхбаярын хэвлэлийн хурал зогсоо чөлөөгүй хөвөрч байдаг билээ.
Бас нэгэн жишээ.
МАН-ын томоохон зүтгэлтэн ХЗДХ-ийн сайд Ц.Нямдоржийг Монголын бүх хэвлэл мэдээлэлийн хэрэгсэлүүд Улаан Цэнхэргүй “банздаж” байхад түүнийг хамгаалах ёстой МАН-ын хэвлэл мэдээлэл олон нийттэй харилцах албаны дарга Д.Амарбаясгалан АНУ-руу “томилолтоор” явсан байна. Тэрээр өнгөрсөн 7 хоногийн эхэнд ерөнхий сайдтай хамт ирэх байсан авч Монголд хэвлэлүүд буцлаж байгаа нь МАН-ын зарим нэгэн хүмүүст ашигтай байгаа бололтой “томилолтоо” ахин хэд хоногоор сунган дуртай дургүй 7 хоногийн сүүлээр ирэв.
Бас нэгэн жишээ.
Ц.Нямдорж бол Засгийн газрын гишүүн. Гэвч Монгол улсын засгийн газрын хэвлэл мэдээлэл, олон нийттэй харилцах хэлтэс гэж бий. Зөвхөн Монгол улсын ерөнхий сайд С.Батболд болон түүний эхнэрийн мэдээлэлд л хяналт тавиад суухаас бусад гишүүд нь яаж байх нь тэдэнд пад байхгүй. Хэвлэлийн албаны дарга нь ганцхан утас цохиод л хэвлэлүүдийг “нам” болгож чадах болов ч тэд тэгсэнгүй.
Бас нэгэн жишээ.
Дээрхтэй нэн ижил. Ц.Нямдорж нь УИХ-ын гишүүн. УИХ-д хэвлэлийн алба гэж бий. Гэтэл түүний дарга нь мөн л Д.Дэмбэрэл болон Шаравдорж нараа л харж хандаж суухаас бусад гишүүдийг харж хандаж байсан удаагүй билээ.