Наадамд зориулсан 50 тэрбумаас 40-ийг нь Хүй долоон худгийн бүтээн байгуулалтад зарцуулна гэж байна.

Жилдээ ганцхан удаа наадамчдын хөлд дарагддаг буйд тэр газарт ямар юмных нь тийм том бүтээн байгуулалт хийгдэх нь вэ хэмээн эргэлзээ төрмөөр. Урьдчилан төлөвлөж байгаагаар тэнд Сүхбаатарын талбайгаас хоёр дахин том талбай засч тохижуулах гэнэ. Бас 7000 машины зогсоол байгуулна гэж байна. Түүнчлэн үзэгчдийн суудлыг илүү тохилог болгох үүднээс зөөвөрлөх, угсрах боломжтой 3000 гаруй суудал байрлуулахаар төлөвлөжээ. Наадамчдын зорчих хэсэг болон үйлчилгээний хэсгүүдэд эко хавтан тавьж, нийтийн бие засах газрыг нэмэгдүүлэх юм байна. Бас “361”-ийн төмөр замын гармаас Хүй долоон худаг хүртэл шинээр автозам тавих зэрэг бүтээн байгуулалтыг хийхээр төлөвлөсөн гэнэ.

40 тэрбумын нэхэлтэй бүтээн байгуулалтаас одоогоор дуулдаж байгаа нь энэ. Ер нь бол баахан газрыг л цементээр хучих бололтой юм. Бас зарим хэсгийг нь эко гэсэн тодотголтой  хавтангаар бүрэх нь. Өөр гавьтай юм  харагдахгүй банна Энэ жилийн тухайд үндэсннй бөх Төв цэнгэлдэхэд болдгоороо болно. Харин шагайн харвааны талбайг шинээр тохижуулна гэж байгаа. Сурын талбайн үзэгчдийн суудлыг автомашины замаас тусгаарлах гэнэ. Хурдан морьдын уралдааныг зохион байгуулах салбар хорооныхон энэ жил уралдах морьдын тоо нэмэгдэх хандлагатай хэмээн таамаглаж. Тэгээд морь гарааны төхөөрөмжүүдийг шинэчлэх юм байна. Үлдэж буй 10 тэрбумын 3-4-ийг нь наадмын үндсэн үйл ажиллагаанд зориулна гэж байна.

Тавин тэрбумын тавилан ерөнхийдөө нэг иймэрхүү янзаар зурагдсан бололтой юм.

Үндэсний их баяр наадмыг зохион байгуулах үндэсний комисс гэж том сонгуультай дарга нарын дуугардаг мөнгөний хэмжээ жил ирэх бүр нэмэгдсээр байна. Гэхдээ энэ жилийнх шиг ингэж огцом өсч байсан нь үгүй. Эцсийн эцэст энэ 50 тэрбумаас үлдэж хоцрох нь юу вэ гэдгийг бодох учиртай.

Төв цэнгэлдэх хүрээлэн гэж хэдэн талаасаа орон сууцны хорооллоор хашигдаж, машин замаар бүслэгдсэн “хүүхдийн тоглоомын талбай, хөгшдийн нарлах газар”-аас ялгахааргүй болчихсон газар байгаа. Гэсэн хэрнээ зөвхөн морь барианы газартаа 40 тэрбумыг аваачиж булна гэдэг нэг л ойлгомжгүй санагдаад байна. Бонд гэж нохойд барьдаг мод шиг хаа сайгүй цацаж байдаг мөнгөтэй болсон ч юм уу, наадмын 50 тэрбумыг бондын “Гудамж” төслийн хөрөнгөнөөс гаргах гэж байгаа гэнэ.

Тавин тэрбум наадамд бол ахадсан мөнгө. Энэ жил Засгийн газар ийм хэмжээнийхөрөнгө мөнгөөр 10 аймгийн инженерийн шугам сүлжээг шинэчилж шинээр байгуулахаар төлөвлөсөн. Наадамд зарах энэ 50 тэрбум төгрөгөөр ихэнх аймгаа эмчилгээ оношлогооны боломжийн төвтэй болгож, орчин цагийн тоног төхөөрөмжөөр хангахад хүрэлцэнэ. Түүнчлэн ийм хэмжээний хөрөнгөөр 10-12 аймгийг ая тухтай тохилог битүү захтай болгох боломжтой гэхчлэн төсөөлөөд үзээрэй.

Наадамд мөнгө зарлаа гэж илүү үзэх шалтгаан байхгүй. Гагцхүү хэдийг хаана юунд эхэлж зарцуулбал нийгэмд, иргэдэд илүү хүртээлтэй вэ гэдэг л гол шалгуур байх учиртай. Мөнгө төгрөг нь хүрэлцэхгүй, төсөв тойрч хадуураад байдаг эрүүл мэнд, боловсрол гэхчлэн улсын гар харахаас өөр аргагүй салбарууд бий. Тухайлбал, эхний ээлжинд байр байшинг нь яаралтай шийдвэрлэх шаарддагатай гурван сургууль, долоон цэцэрлэг байгаа.

Зайсангийн 32, Баянгол дүүргийн 73, 38 дугаар сургууль болон Баянзүрх дүүргийн 10, 55,149, Сонгинохайрханы 26, Чингэлтэй дүүргийн 118 дугаар цэцэрлэгийн барилга ашиглах боломжгүй болсон. Өөдөөс чинь бүлтэгнэх хүүхдүүдээсээ харамласан мөнгөө хээр хөдөө хэдэн тэрбумаар нь булах тийм их хэрэгцээ шаардлага байна уу гэдгийг л тодотгох хэрэгтэй байгаа юм. Үнэхээр тэгж наадам цэнгэлд зарцуулах гээд байгаа юм бол орчин цагийн шинэ цэнгэлдэх хүрээлэн барьж байгуулбал яасан юм. Ядахад дараа нь улсын хийгээд олон улсын чанартай уралдаан тэмцээн зохиох бэлэн байр савтай болно гэсэн үг шүү дээ.

Ц.ЭРДЭНЭЦЭЦЭГ

ЭХ СУРВАЛЖ: ӨДРИЙН ШУУДАН