“Johnson’s baby”-ийн шампунь болон биеийн шингэн савангаас хүүхдийн эрүүл мэндэд сөрөг нөлөө үзүүлдэг химийн бодис илэрсэн тухай америкийн мэргэжилтнүүд мэдэгдсэн байна.

АНУ-ын Аюулгүй гоо сайхны бүтээгдэхүүний төлөөх олон нийтийн байгууллага “Johnson’s baby”-ийн шампуниас  хорт хавдар үүсгэдэг канцерогенийн гэгдэх диоксан болон бактерийн эсрэг үйлчилгээтэй Кватерниум-15 (төв мэдрэлийн системд сөрөг нөлөө үзүүлдэг  формальдегид ялгаруулдаг химийн бодис) зэрэг бодисуудыг илрүүлжээ.

“АНУ, Австрали, Канад, Хятад болон Индонез зэрэг орнуудад худалдаалагдаж байгаа “Johnson’s baby” хүүхдийн шампунид шинжилгээ хийхэд Кватерниум-15 илэрсэн бол Дани, Финлянд, Япон, Голланд, Норвеги, Өмнөд Африк, Швед болон Их Британид зарагдаж буй “Johnson’s baby”-ийн бүтээгдэхүүнээс дээрх бодис илрээгүй. Тиймээс “Johnson & Johnson” компани дэлхийн зах зээлд гаргаж буй хүүхдийн шингэн савангаа аюулгүй болгох бүрэн чадвартай гэдэг нь харагдаж байна” хэмээн тус байгууллагын захирал Лиза Арчер ярьжээ.

Уг асуудлаар тус байгууллагын төлөөлөгчид “Johnson & Johnson” компанид диоксан болон Кватерниум-15  бодисуудаас татгалзах шаардлага тавихад “эхний ээлжинд дээрх бодисуудын агууламжийг багасгаад дараа нь аажмаар хэрэглээнээс хасна” гэсэн хариулт өгчээ.

А.Цацрал

Эх сурвалж: www.brandchannel.com