“Юнивишнийн шилэн кабелийн холболтын нэг үзүүр бүхий сүлжээгээр дамжуулан Танай гэр бүл дэлхийн технологийн гайхамшиг IPTV, Интернэт, Суурин утас гэсэн 3 үйлчилгээг нэгэн зэрэг хүлээн авах боломжтой болно” хэмээн жил гаруйн өмнө “Юнител” группын охин компани болох “Юнивишн” нээлтээ хийж байв . Энэ үйлчилгээ Монголдоо анхдагч нь байж олон мянган хэрэглэгчийг /20 мянга орчим/ гурвалсан үйлчилгээгээрээ  татаж эхэлсэн.

Тус компанийн үйлчилгээг сонгосон хэрэглэгчдийн гомдол, бухимдал хаа сайгүй сонсдсоор л байх юм. Тодруулбал, интернэт нь удаан байна, тасраад болдоггүй, манай суваг гарахгүй юм, ажилладаггүй ээ, буцаах үйлчилгээ нь зөвхөн цөөн тооны нэвтрүүлгийг тодорхой хугацаанд хамаатай болж, үзэх биш хүлээх болдог, “Ftp” программ ашигладаг хүмүүсийн программыг нь хаадаг /Хэрэгтэй портуудыг/ хэлэхээр инженерүүдээрээ шалгуулаад хариу өгнө гэж хэлээд өдрийн тал болдог, асуудал гараад хоёр хоног хүлээлгэж байж засч өгсөн,  “Ftp” болон бусад программууд орохоо байчихдаг гэх мэт компанийн үйлчилгээ бүрт гомдол энэ хугацаанд тасарсангүй.

Аргаа барж бухимдсан хэрэглэгчид  санал гомдол авдаг утас руу залгахаар утсаа авдаггүй, авахаараа “Сайн байна уу? Та гэрээний дугаараа үлдээнэ үү. Үйлчилгээг нь шалгаад эргэн холбогдох болно” гэж хэлээд ахин холбогддоггүйд нь бүр ч их бухимддаг.

Монголдоо шинэлэг үйлчилгээ нэвтрүүлж байгаад нь хүлээцтэй хандаж, алдаа дутагдлыг нь хүлээн зөвшөөрч байсан олон хэрэглэгч бий ч үйл ажиллагаагаа эхлээд жил гаруй хугацаа өнгөрч байхад байгууллагын үйл ажиллагаа одоог хүртэл жигдрээгүй л байна.

Өнгөрсөн зунаас эхлээд үйлчилгээ нь доголдож эхлэхэд компанийн зүгээс “Манайх одоогоор IPTV 2.0 үйлчилгээг ашиглаж байгаа юм.Харин ирэх долоо хоногоос 3.0 үйлчилгээнд шилжих гэж байгаа. Үүнээс үйдэлтэйгээр тасрах, гацах зэрэг доголдол гарч байгаа. Энэ талаараа ч ирэх долоо хоногоос хэрэглэгчиддээ мэдээлнэ. Мөн зам засварын ажилтай холбоотойгоор засч буй компаниуд шилэн кабелийн утсыг тасласан. Иймэрхүү зүйлээс болоод үйлчилгээний доголдол гарсан байгаа. Тэгээд ч энэхүү шинэ системд шилжсэнээр гомдол багасч, өөр түвшинд очих болно” гэсэн тайлбарыг өгсөн ч үүнээс хойш хоёр улиралыг үдээд гурав дахь улиралтайгаа золгох гэж байна.

Хэрэглэгчийн эрх ашгийг хамгаалдаг  ШӨХТГ-т  “Юнивишн” ХХК-ийн үйлчилгээний талаарх иргэдийн гомдол ч их ирдаг аж. Удаа дараа ирүүлж байгаа хэрэглэгчдийн энэхүү гомдлыг барагдуулах үүднээс ШӨХТГ-аас гэрээний заалтад өөрчлөлт оруулах талаар албан шаардлага хүргүүлээд байсан. Үүний хариуд “Юнивишн” ХХК-ийн дэд захирал А.Дуламрагчаа “2013 оны 4-р сарын 25-ны өдрийн 03/384 тоот албан бичгээр 2013 оны 5-р сарын 1-ээс эхлэн гэрээний заалтыг “Хэрэглэгчийн гомдлын дагуу тасалдсан шалтгаан нөхцөлийг тогтоож, хэрэв “Юнивишн” ХХК-ийн буруутай үйл ажиллагаанаас шалтгаалсан байвал хэрэглэгчийн үйлчилгээ аваагүй хугацааны төлбөрөөс чөлөөлнө” хэмээн өөрчлөлт оруулсан тухайгаа мэдэгдсэн.

Өнөөдөр асуудал бахь байдгаараа төлбөрөөсөө  чөлөөлүүлсэн хэрэглэгч алга. Ийм үйлчилгээгээр мөнгө олж, хэрэглэгчдийнхээ бухимдлыг төрүүлсээр байх хугацаа хэр удаан бэ? Юнивишн!!!

Эх сурвалж: Шуурхай.мн