Түүнчлэн саяхан ШӨХТГ-т сүлжээ дэлгүүрүүдэд шалгалт хийхэд “Миний сүлжээ” дэлгүүрийн гурван салбар тэнцээгүй. Шалгалтын үеэр Жуков, Дамбадаржаа, Од кино театрын ойролцоо байрлах гурван салбарт чанарын шаардлага хангаагүй хүнсний бүтээгдэхүүн болон хугацаа нь дууссан лаазалсан бүтээгдэхүүн зарж байсан нь тогтоогдсон аж.

Тийм учраас ШӨХТГ-хан тус гурван салбарын үйл ажиллагааг түр хугацаагаар хаасан байна. Энэ талаарх зарим зүйлсийг ШӨХТГ-ын дарга О.Магнайгаас тодруулахад “Шалгалтын үеэр энэ гурван сүлжээ дэлгүүр чанарын шаардлага хангахгүй хүнсний бүтээгдэхүүн зардаг болох нь тогтоогдсон.

Тиймээс хэсэг хугацаагаар үйл ажиллагааг нь зогсоосон байгаа. Заасан хугацаанд илэрсэн зөрчлийг арилгахгүй бол сүлжээгээр нь хаана” гэсэн юм. Харин “Миний сүлжээ” дэлгүүрийн удирдлагуудтай холбогдож мэдээлэл авах гэсэн боловч мэдээлэл өгөх хүн байхгүй байлаа.

Миний сүлжээ дэлгүүрийн зарим нэг салбараар ороход өмнө нь ийм байсан билүү гэмээр байдал угтлаа. Хэрэг болохоор олддоггүй ажилтнууд нь ч байх ёстой газраа ажлаа хийж, юм асуухад ихэд уриалганхан хариулж зөвлөж байлаа.

Тэд замбараагүй байдаг лангуугаа цэгцэлж, бүтээгдэхүүнээ арчиж цэвэрлэж харагдсан. Нэг үгээр хэлбэл гэнэтийн шалгалт тэднийг хариуцлагатай болгосон юм шиг. Энэ үеэр зарим бараа бүтээгдэхүүний хугацаа, чанарыг харахад зөрчилтэй зүйл ажиглагдсангүй.

Мөн хямдрал зарласан бүтээгдэхүүний талаар лавлахад “Манайх гаригуудад ээлжлэн бараагаа хямдруулдаг юм. Түүнээс хугацаа нь дууссан юм биш ээ” гэсэн хариулт өгч байв.

“Хэмнээд илүү амьдарцгаая” уриатай нарны зам дагуух “Миний хайпермаркет”-аар ороход үүдэн дээр нь дүүрэн сагс, бужигнасан хүмүүс угтлаа. Жимс, ногоо зардаг хэсгээс задгайгаар авсан хүн заавал жинлүүлэх ёстой аж.

Гэтэл жингийн урд худалдан авагчид овоорчихсон, бухимдацгааж байсан. Жин дээр зогсч байсан охин тэдгээр хүмүүсийг дэглэж байгаа нь энэ аж. Ундууцсан нэг нь “Кодыг нь мэдэхгүй байна, хөөе хэнээ энэ алимны код хэд юм бэ” хэмээн хашгирч байсан юм.

Тэгвэл үүнийг хиллээд өгөөч гэсэн хүмүүсийг “Байж бай завгүй байна” гэж загнаж гарав. Харин лаазалсан бүтээгдэхүүний тасагт туслах ажилтан байхгүй байгаа бололтой хэдэн хүн “Юм асууя, Энэ тасгийн ажилтан байна уу” гэж орилж байсантай таарлаа.

Энэ мэтээр эмх замбараагүй, эзэнгүй орчин угтсан. Уг нь кассны машин олонтой юм. Гэтэл хоёрхон хүн үйлчилж байсан. Үйлчлүүлэгчид их бухимдаж, урт дараалал үүсгэсэн байна.

Удаан хүлээж бухимдсан үйлчлүүлэгчийг “Хөнгөлөлтийн карт уншихгүй байгаа” гэж бүр ч даарин дээр давс нэмж орхив. Энэ үеэр зарим үйлчлүүлэгчдээс тус дэлгүүрийн үйлчилгээ болон бусад зүйлсийн талаар тодруулсан юм.

Манайх “Номноо” хотхонд байдаг. Ойр хавьд энэ дэлгүүрээс өөр дэлгүүр байдаггүй болохоор эндхийн оршин суугчид үйлчлүүлэхээс өөр аргагүй. Заримдаа үйлчилгээ нь гайгүй л байдаг юм.

Заримдаа бол бүр хэцүү. Үйлчлүүлэгчийн авсан барааг хааяа өөр кодоор бичиж илүү үнэ авна. Тэгээд хэлэхээр андуурчихсан байна гэдэг. Хөнгөлөлтийн карт нь ямар ч ашиггүй. 30 гаруй мянган төгрөгийн бараа аваад байхад 70 төгрөг хөнгөлж байх жишээтэй. Их том дэлгүүр хэрнээ сонголт их муутай.

Би сая кассан дээр нь 15 минут орчим зогсч байж гарч ирлээ. Ажилчид нь их удаан, зан харилцаа муутай. Оройн цагаар энэ дэлгүүрээр үйлчлүүлэхэд бөөн дараалал үүсчихсэн байдаг. Кассаа нэмээч гэсэн хүсэлт тавихад хүн байхгүй байна гэсэн хариулт л өгдөг.

Жимс, ногоо нь төдийлөн сайн биш. Ихэнхдээ зөөлөрсөн байдаг. Кассан дээр нь зогсдог зарим ажилчид нь их бохир байдаг. Уг нь хүмүүс их үйлчлүүлдэг юм шиг байна лээ. Энэ мэтээр байвал удахгүй орох хүнгүй болох байх даа.