Энэ сарын 10-нд Баянзүрх дүүргийн 11 дүгээр хороонд 46 настай иргэн Д өөрийн таван настай хүү заазуурдаж бэртээсэн хэрэг гарсан. Хүү Цэргийн төв госпиталын эмнэлэгт нуруундаа оёдол тавиулаад гэртээ эмчилгээ хийлгэж байгаа.

Харин өнөөдөр нийгмийн идэвхитэй хүмүүс хүүг эргэж гарын бэлэг, ойр зуурын зүйлс өгсөн байна. Энэ хүүхдийг орон гэртэй болгох болон бусад асуудлаар “Лантуун дохио” бүлгэмийнхэн ажиллаж байгаа бөгөөд тэдний өрнүүлсэн аяны хүрээнд хүүхдэд зориулан одоогоор нэг сая 500 мянган төгрөг төвлөрөөд байгаа гэнэ.

Харин хүүхдийг хэрцгийгээр хүчирхийлж, зодож танхайрсан эцэг нь одоогоор Хорих 461-р ангид цагдан хоригдож шалгагдаж байгаа юм. Түүнд Эрүүгийн хуулийн тусгай ангийн 181.3-т зааснаар хэрэг үүсгэн шалгаж байгаа бөгөөд 5-8 жилийн ял онооно хэмээн заагдсан байгаа. Харин түүнд ялыг нь нэмэгдүүлэхээр “Лантуун дохио” ТББ-аас гурван хүүхэд болох эхийнх нь биед нарийн шинжилгээ хийлгэж, бүх зургийг нь авахуулж байгаа ажээ.

Эх сурвалж: Шуурхай.мн