Хэрлэн сумын VIII багийн нутаг Тахилгат тосгоны Маш мухар хэмээх газарт энэ сарын 6-ны 13.00 цагийн орчимд гарсан түймрийн уршгаар хоёр хүний амь эрсджээ. Мөн хоёр хүн III, IV зэргийн түлэгдэл авч Гэмтлийн эмнэлгийн түлэнхийн төвд хүргэгдэн ирэв.

Талийгаачдын хувьд Тахилгат тосгоны Буянтын давааны ар Шарилжит Ар булаг гэдэг газарт нутаглаж байсан аж. Гэтэл Батноров сумын I багийн харьяат малчин Р-ийн гэр түймэрт өртөж, ээж, эхнэр хоёр нь нар нас барж, Р болон түүний хүү нар түлэгдэж аймгийн нэгдсэн эмнэлгийн сэхээний тасагт авчирч эмнэлгийн анхны тусламж үйлчилгээг үзүүлэн хот руу авч явжээ.

Мөн энэ түймэрт Батноров сумын VII багийн хоёр айлын 140 ямаа, хоёр гэр, хашаа, саравч шатсан гэсэн урьдчилсан мэдээ бий. Хэрлэн сумын Засаг даргын Захирамжаар томилогдсон ажлын хэсэг түймрийн хохирол, шалтгаан нөхцлийг тогтоохоор ажиллаж байна.