Хэдхэн хоногийн дараа хүүхдийн баяр болно. Багачуудын хувьд бүтэн жилийн турш хүсч, хүлээсэн баяраараа хаана, яаж баярлахаа хэдийнэ төлөвлөчихөөд зургадугаар сарын 1-нийг хоног тоолон хүлээж суугаа. Харамсалтай нь багачууд хүсч, хүлээсэн энэ өдрөө паркад өнгөрүүлж чадахгүй нь. Мэдээж  энэ өдөр парк ажиллана. Харин үнэ нь тэнгэрт хадчихаж. Тиймээс л нийслэлийн багачуудын тэн хагас нь паркад тоглох эрхээ “хасуулах” бололтой. Тодруулбал,  20 мянган төгрөг төлөөд паркийн бүх тоглоомон дээр тоглож болох гэнэ.

“Бүх тоглоом” гэдэг тайлбар тэнгэрт хадсан үнийг арай зөөлрүүлж сонстож байгаа биз. Гэхдээ энэ бол зөвхөн ганц хүний паркийн хашаагаар нэвтрэх тасалбарын үнэ. Өөрөөр хэлбэл, Үндэсний соёл, амралтын хүрээлэн энэ онд үнийн тогтолцоондоо шинэчлэлт хийжээ. Өмнө нь парк руу ороход 1000 төгрөгийн тасалбар авдаг байсан юм. Мөн нэг  тоглоом дээр  4000-6000 төгрөгөөр тасалбар,  бусад тоглоом тус бүрт зоос худалдан авч тоглодог байсан. Мөн Cool, Happy  багцын тасалбараар үйлчлүүлдэг байсныг санаж байна.

Тэгвэл  паркын  шинэ тогтолцооны дагуу том хүн 20 мянга,  хүүхэд 15 мянган  төгрөгөөр бүх тоглоом дээр тоглодог болж байгаа аж. Харин хоол, унд, автомат тоглоом болон бусад зүйлс  тус бүрдээ бүгд төлбөртэй.  Мэдээж бага насны хүүхдүүдээ эцэг, эхчүүд ганцааранг нь явуулахгүй. Ах, эгчтэй нь эсвэл өөрсдөө дагуулаад баярлуулах шаардлага тулгарна. Үүнээс гадна бага насны хүүхдүүд ганцаараа бүх тоглоомон дээр суугаад тоглож чадахгүй. За тэгээд ганц хүүхэдтэй гэр бүл ховор.  Ямар ахыг нь тоглуулчихаад дүүг нь гомдоолтой нь биш. Хэдийгээр тухайн хүүхдийн асран хамгаалагч нь өөрөө тоглохгүй байсан ч заавал 20 мянган төгрөгийн тасалбар авч байж, дотогшоо нэвтэрнэ. Ингээд бодохоор ганц хүүхэдтэй гэр бүл байлаа гэхэд дор хаяж 60 мянган төгрөгөөр зөвхөн тоглох нь. Үүнээс гадна хүүхэд л болсон хойно чихэр, жимс рүү “нүд унагаана”. Хүн л болсон хойно гэдэс нь өлсч, ам нь цангана.

Харин паркийн хашаан дотор худалдаалагддаг бүх зүйл дэлгүүрийн үнээс нэг дахин өндөр. Үүнээс гадна паркийн хашаан дотор  байдаг ганц зоогийн газрынх нь үнэ гэж ялгаагүй тэнгэрт хадчихсан. Ахлах болон дунд ангийн сурагчдын хувьд 130 см-ээс дээш өндөртэй бол “том хүний” тоонд орох тул 20 мянган төгрөгийн тасалбар авах шаардлагатай. Учир нь паркийн хашаан доторх тайлбарт “Том хүн гэдэг нь 130 см-ээс дээш өндөртэй бол том хүн, 130 см-ээс доош гурван наснаас дээш бол хүүхдийн тасалбар худалдан авна” хэмээн бичсэн байсан. Тэгэхээр ахлах болон дунд ангийн сурагчдын хувьд жижиг биетэй заримынх нь хувьд “бөөн олз” болж, хүүхдийн үнээр тоглох нь. Орчин цагт бараг 130 см өндөртэй ахлах ангийн сурагч гэж байхгүй. Дунд ангийн хүүхдүүд ч өсгөлүүн биетэй болсон цаг.

Тэгэхээр паркийн удирдлагууд үнэ ханшаа шинэчлэхдээ айхтар нарийн тооцсон байгаа биз. Бага ангийн болон цэцэрлэгийн насныхан л 15 мянган төгрөгөөр тоглоно. Харин дунд болон ахлах ангийнхан заасан хэмжээнээс нь өндөр тул 20 мянган төгрөг төлөх нь. За тэгээд ахлах болон дунд ангийнхны хувьд паркын хэдэн төмөр тоглоом тийм сонин биш. Тэдэнд автомат тоглоом нь илүү сонирхолтой. Гэтэл 20 мянгын тасалбарт нь автомат тоглоом хамаарахгүй. Дахиад л мөнгө төлөх шаардлагатай. Энэ бүхэн ардын хүүхдэд бол арай л ахадсан үнэ санагдаад байгаа юм. Яах вэ, баячуудын хүүхдүүдэд бол сонин биш. Жилдээ ганцхан удаа тохиодог баяраар нь хүүхдүүдийг ингэж “боомилох” шаардлага байна уу. Магадгүй гэр хорооллын зарим хүүхдүүд амьдралдаа анх удаа энэ жил  парк орж тоглохоор болсон ч байж мэднэ шүү дээ. Гэтэл нэг удаад 60-70 мянган төгрөгөөр хүүхдээ баярлуулах чадалтай нь бидний дунд хэд билээ. Паркад үнэгүй нэвтрэх эрхтэй хүмүүс бол 0-3 насныхан. Гэхдээ эцэг, эхчүүд бас л мөнгө төлнө.

Монголын мэдээ