Намбарын хүү намбандаа байгаагүйгээс цагдаа хүчний байгууллагынхантай муур, хулгана болж тоглоод хэдэн өдрийг элээлээ. “Эдээрээ оролдвол эвдэхийн тэмдэг, эхнэрээрээ оролдвол салахын тэмдэг” гэдэгчлэн төрөөрөө оролдож ханахгүй байгаа Н.Энхбаяраар төр одоо оролдох цаг нь ирсэн бололтой. “Авлигын загалмайлсан эцэг” гэдэг арилшгүй хэргэмийг олны амнаас хүртсэн Н.Энхбаярыг баривчлах юм бол шалгаж мухарлах шаардлагатай олон арван хэргүүд байдаг юм. Эдгээрийг тухай бүрт нь хэвлэл мэдээллийн хэрэгслээр шуугьж, бичиж байсан ч “Өндөр эцэг”-ийн албан тушаалын сүр бараанд дарагдаж өнгөрдөг байсан. Одоо цаг өөр болж хэвлэл мэдээллийн хэрэгслээр гарсан мэдээллийн мөрөөр орж шалгаад эрүүгийн хэрэг үүсгэж үнэн мөнийг тогтоодог болжээ.

Нийгэмд бугшаад буй бүхий л идээ бээрийг баримт сэлттэй нь олны өмнө дэлгэж, нийгмийг цэвэршүүлэхийн төлөө мэдээллийн тэргүүн фронтод зогсдог Масс.мн сайт энэ удаа Н.Энхбаяртай нэр холбогдон хэвлэл мэдээллийн хэрэгслүүдээр гарч байсан хэргүүдийн жагсаалтыг хүргэж байна.

1. АПУ-гийн хувьчлалтай холбоотой 500 саяын авлигын хэрэг

Н.Энхбаяр “АПУ” компанийн хувьчлалын үеэр өөрийн биеэр “Надад нэг этгээд 500 саяын хахууль болгож өгөх гэлээ” гэж зарласан. Монголын үндэсний үйлдвэрлэгч том компани болох “АПУ”-г хувьчлах үеэр үнэхээр ийм үйлдэл болсон гэдгийг тэрээр өөрөө ийнхүү олонд зарласан ба түүнд 500 саяын хахууль өгөхөөр завдаж байсан тэр этгээдийн нэр ус, холбогдох материалыг Масс.мн сайт ирэх долоо хоногт уншигчдадаа хүргэх болно.

Макаочууд Монголд казино байгуулах гэж одоогийн Ерөнхий сайд С.Батболдын Чингис зочид буудлыг түрээслээд мөрийтэй тоглоомын газар болгон засч янзлан ид бужигнуулж, “Казино” хочит Л.Байгаль албан өрөөндөө улстөрч, өндөр албан тушаалтнуудыг ээлж дараалан хүлээж авч монетон өлгүүрт хувцсыг нь өлгөн хүндлэл үзүүлэн гүйж байх үед хэвлэлүүд Намбарын Энхбаярыг Казиногийн хуулийг батлуулахын тулд 20 мянган долларын хахууль авсан гэж бичиж байв.

3. ХХБ-тай холбоотой хууль бус хувьчлалын хэрэг

Н.Энхбаярыг ХХБ-ийг эрх мэдлээрээ дамжуулан хууль бусаар хувьчилсан гэдэг. Харин Н.Энхбаяр болохоор өөрөө энэ хувьчлалыг одоогийн Шадар сайд М.Энхболдод хамаатуулдаг. М.Энхболд тухайн үед ХХБ-ны төрийн мэдлийн 76 хувийг хувьчилж авсан “Жеральд металлз”-ынхантай АНУ-д очиж уулзаж байсан гэдэг юм. 2004 онд ХХБ-ны төрийн мэдлийн хувьцааг “Жеральд металлз” болон Италийн “Лугано коммершилл” банк авсан. Тухайн үедээ 403 тэрбум төгрөгийн активтай байсан тус банкийг 12.5 сая доллараар зарсан ч 2007 оны эхээр тэд монголчуудад анх авсан үнээсээ дөрөв дахин их үнээр буцаан зарж орхисон. Тэднээс ийм өндөр үнээр буюу 70 сая доллараар худалдаж авсан хүн нь хэний ч үл мэдэх “сахал” хочит Л.Эрдэнэбилэг гэгч байсан билээ. Энэ их мөнгөний хувьчлалтай холбоотой хэрэгт чухам Н.Энхбаярыг яагаад холбогдуулан бичиж байсныг шалгаж тогтоогоод өгвөл өөрт нь ч хэрэгтэй байж таарна.

Н.Энхбаяр нь засаглалын тэргүүн байх үедээ эрх мэдлээ хэтрүүлэн ашиглаж ХХБ-наас төсөвт төлөх ёстой байсан 3.6 тэрбум төгрөгийг төсөвт төвлөрүүлээгүй гэгддэг юм. Энэ нь мэдээж ХХБ хувьчлагдахаас өмнөх асуудал.

6. Гаалийн Х.Баатартай холбоотой байр, мөнгөний хэргүүд

Нэгдүгээрт Гаалийн Х.Баатараас МАХН-ын санхүүжилтэнд их хэмжээний мөнгө авсан тухай “хувьсгалын” хэрэгт Н.Энхбаяр орооцолддог. Хоёрдугаарх нь хувьсгалын бус хувийн хэрэг бөгөөд Н.Энхбаяр эгч Намбарын Энхтуяадаа Гаалийн Х.Баатарыг дарамталж байж 3 өрөө байр авч өгсөн тухай асуудал юм. Ер нь Н.Энхбаяр ах дүүгээсээ гадна тойрон хүрээлэгчдээсээ цөөнгүй хэдэд нь орон байр, хаусны асуудлыг нь шийдэж өгсөн байдаг ч тэдгээрийн бараг дийлэнх нь өнөөг хүртэл их эцгээсээ хүртсэн орон байрныхаа ордерийг ч хараагүй яваа.

Өдгөө Н.Энхбаярын төлөө бүрэн үйлчилдэг, ард түмэн аль хэдийнэ түүний өмч гэдгийг нь нүдээ аниад хүлээн зөвшөөрчихсөн нэг телевиз бол 2.6 сая долларын өртөгтэй бурхны гэгдэх телевиз. ТВ-9 телевизийг өмчлөхдөө Монгол улсад бэлэглэсэн тоног төхөөрөмжийг Гандантэгчинлэн хийдийн хамба Б.Чойжамцтай мар мархийтэл инээж суугаад хуваагаад халаасалчихсан. Мөн “Зууны мэдээ” сонинг дотроос нь хувьцааг нь бага багаар цуглуулсаар байгаад нэг л өглөө эрхлэгчийг нь, сэтгүүлчидтэй нь хөөж гаргаад эзэн суучихсан явдал бий.

Монгол банктай холбоотой 8 сая долларын асуудал босч ирж байсан ба мөн Монгол банкны захирал асан, өдгөө УИХ-ын гишүүн О.Чулуунбат Н.Энхбаяр нарын 130 сая доллар угаахыг завдсан тухай ч шуугьж байв.

Түүнийг Ерөнхий сайд байхдаа Засгийн газрын нөөцийн хөрөнгөнөөс дур мэдэн 55 сая төгрөгийг өөрийнхөө биеийг сувилуулахад ашигласан гэдэг. Мөн тухайн үедээ хэвлэл мэдээллийн хэрэгслүүдийг худалдан авч хахуульдахад 380 сая төгрөгийг Засгийн газрын нөөцийн хөрөнгөнөөс гаргасан тухай асуудал ч бий. Үүнтэй нь холбоотойгоор түүний эхнэрийн толгойлдог байсан “Чөлөөт хэвлэлийг дэмжих сан”-гийн санхүүжилт, хөрөнгө зарцуулалтын асуудал ч яригдана.

Н.Энхбаяр “Их тэнгэр”-ийг засуулах нэрээр 600 сая төгрөгийг “зохицуулж” орхисон гэдэг. Энэ зохицуулсан мөнгөний талаар сөхвөл ч бас хоосонгүй байх бололтой дуулддаг байсан.

Тэрээр УИХ-ын гишүүн Ц.Мөнх-Оргилын эхнэрийн “Арго” компанид 80 сая төгрөг төлсөн гэх ба энэ нь чухам ямар зориулалтаар, юуны төлбөр болж орсныг нь хэвлэлийнхэн тааварлаж ч чадахгүй хоцорсон.

Төр засгийн алба хашдаг, хувийн бизнесгүй атлаа Москва хотод өндөр үнэтэй байшин худалдаж авсан гэгдэж байв. ОХУ-д өндөр үнээр байшин худалдаж авч байсан гэгдсэн тэрээр АНУ-ын Сан Францискод мөн л хувийн байшинтай гэгдэх болсон.

Н.Энхбаярыг ОХУ-ын Байгаль нуурын эрэгт хувийн амралтын газартай гэлцсэн ба юутай ч Эрхүүгийн цанын баазад очсон хэнбугай ч түүнийг эхнэр О.Цолмонтойгоо жаргалтай нь аргагүй цана чаргаар наадаж яваа зургаар дүүрсэн аялал жуулчлалын баазын каталогийг үзэж болдог юм.

Н.Энхбаяр МАХН-ын дарга байхдаа 10 аймгийн МАХН-ын даргыг орон сууцаар шагнасан байдаг юм. Энэ нь хахууль уу, улстөрийн намынх нь ажил байсан уу гэдэг одоо ч эргэлзээтэй байгаа асуудлын нэг.

Ш.Монголтоосго

Масс.мн