Эрүүл мэндийн яамны Төрийн нарийн бичгийн дарга асан Н.Түмэндэмбэрэл болон тус яамны Оношилгоо, эмчилгээний

хэлтсийн дарга Д.Гончигсүрэн, яамны мэргэжилтэн П.Отгонжаргал нарыг Эрүүгийн цагдаагийн газраас өнгөрсөн баасан гарагт баривчлан саатуулсан байна. Учир нь тэд салбартаа шинэ технологи нэвтрүүлэх, мөн бусад тендер зэргээс өөрийн хамаатан садантайгаа хуйвалдан төрийн халааснаас олон тэрбум төгрөгийг хувьдаа завшсан нь хуулийн байгууллагын шалгалтаар тогтоогджээ.

Н.Түмэндэмбэрэл нарын энэ хэрэг саяар биш тэрбумаар хэмжигдэх бөгөөд МИАТ-ын хэрэгтэй бараг энэ тэнцэхүйц гэдгийг эх сурвалжууд онцолсон. Учир нь тэд Эрүүгийн цагдаагийн газарт тоног төхөөрөмж, техникийн чиглэлээр шал­гагдаад нэлээд удсан аж. Гэвч мөрдлөгийн эцэст өөрийнхөө найз нөхөд, ах дүүгээ аливаа тендерт хууль бусаар шалгаруулдаг байсан гэнэ.

Тэдний төрийн мөн­гөнөөс дур зоргоороо хүртдэг байсан баримтуудаас дурьдвал орчин үеийн оношилгооны хоёр ширхэг MRI аппарат авна гэж яамны төсвөөс гурван тэрбум төгрөг гаргуулсан юмсанж. Түгээрээ гадаадад хэрэглэж байсан хуучин аппарат оруулж ирсэн байна. Мөн эмнэлгийн зориулалттай бүрэн тоноглосон явуулын хоёр машин авах нэрийдлээр 1.6 тэрбум төгрөгийг халаасалжээ.

Гэхдээ энэ машинууд нь Герман улсад хэрэглэж байсан мөн хуучин эд байж. Түүнчлэн Н.Түмэндэмбэрэлийн гэрт нэгжлэг хийхэд их хэмжээний мөнгө гарсан гэх мэдээлэл бас бий. Ямартай ч одоогоор Улсын мөрдөн байцаах газрын эдийн засгийн гэмт хэрэгтэй тэмцэх хэлтэст шилжүүлэн үргэлжлүүлэн шалгаж буй юм. Хэргийг бүрэн шалгаж дуусаагүй байгаа болохоор бусад хууль бус үйлдлүүдийг нь дурьдах боломжгүйг эх сурвалжууд хэлсэн. Дашрамд дурьдахад 1.6, гурван тэрбум төгрөг зөвхөн эхнийх нь бөгөөд түүнээс ч олон сүлжээ хэрэг илэрч магадгүй аж.

Н.ТҮМЭНДЭМБЭРЭЛ ГЭЖ ХЭН БЭ

Тэгвэл  Н.Түмэндэмбэрэл гэж чухам хэн бэ гэдэг асуулт гарч ирнэ. Учир нь дээрх хэрэгт “гол дүрийн жүжигчин” нь байсан болохоор хуулийнхан түүнд анхаарлаа илүү хандуулж байгаа бололтой. Тэрбээр 1985 онд ЗХУ-ын Ленинград хотын Санхүү, эдийн засгийн дээд сургууль, 2001-2002 онд Худалдаа, үйлдвэрлэлийн дээд сургууль төгссөн. Улс ардын аж ахуйн төлөвлөгч-эдийн засагч мэргэжилтэй. Доктор зэрэгтэй. Мөн МАХН-ын Төв хорооны Сэтгүүлүүдийн нэгдсэн редакцид утга зохиолын ажилтан, “Боловсрол” сэтгүүлийн хариуцлагатай нарийн бичгийн дарга, “Прогноз” төвийн дэд захирал, МАХН-ын Удирдах зөвлөлд Сан, хөрөнгө эрхлэх газрын дарга, Санхүү, эдийн засгийн яамны Төрийн нарийн бичгийн дарга, ОХУ-ын Улаан-Үд хотод суух Ерөнхий консул, Орон сууцны санхүүжилтийн корпорацийн дэд захирал, Эрүүл мэндийн яамны Санхүү, хөрөнгө оруулалтын газрын даргаар ажиллаж байсан.

Эрүүл мэндийн сайд асан С.Ламбаагийн үед тэрбээр тус яамны Санхүү, хөрөнгө оруулалтын газрын даргаар ажиллаж байв. Гэтэл АН хамтарсан засгаас өнгөрсөн жил гарсаны дараа МАН-ын Н.Хүрэлбаатар Эрүүл мэндийн сайдаар томилогдоход Н.Түмэндэмбэрэл яамны Төрийн нарийн бичгийн даргын үүрэг гүйцэтгэгчид нэр дэвшсэн. Улмаар төд удалгүй 2012 оны гуравдугаар сард албан тушаалыг нь жинхэлж өнгөрсөн оны есдүгээр сар хүртэл тус албыг хашсан байдаг. Түүний эл өндөр албан тушаалаас халагдсан гол шалтгаан нь Ерөнхий сайд Н.Алтанхуягийн чихэнд “Н.Түмэндэмбэрэл ажил, үүргээ хангалтгүй хийдэг” гэх яриа үргэлж очдог байсантай холбоотой гэдэг. Нөгөөтэйгүүр  түүнийг учир мэдэх нь МАН-ын хүн гэх яриа ч бий.

Харин хамт шалгагдаж байгаа ЭМЯ-ны Оношил­гоо, эмчилгээний хэлтсийн дарга Д.Гончигсүрэн Н.Түмэн­дэмбэрэлийг Төрийн нарийн бичиг байхад энэ албыг авсан байна. Өөрөөр хэлбэл түүний хамтарч бизнес хийх хамгийн ойр дотны итгэлт нөхдийнх нь нэг.

Л.Энхдэлгэр