Шинэчлэлийн Засгийн газрын тэргүүн хэдэн нөхдөө дагуулаад цаг агаарын ороо бусгаа үед Бурхан Халдуныг зорьж, хөлдөө хөгөө чирж, онигоо боллоо. Засгийн хуралдаанаа ч бүрэн гүйцэтгээгүй тэдэнд дээд тэнгэр гэсгээл хүртээсэн бололтой. 40 гаруй цагийн туршид үхсэн амьд нь мэдэгдэхгүй сураг тасраад байсан тэднийг тусгай, онцгойгийн хэдэн нөхөд өдөржин шөнөжин хайсны эцэст олж, эрлийг үзүүрт сураг гаргалаа.

Татвар төлөгчдийн мөнгөөр 70 уулаа явж зугацаах гэсэн биш амь насаа алдах гэсэн тэдэнд энэ явдал хатуухан сургамж болж байна. Төрийн мөнгөөр тансагласан тэд  зүгээр ч нэг явалгүй араасаа бөөн чирэгдэл дагуулж, бас болоогүй төсвийн 85 сая төгрөгийг зарлагдлаа. Мэдээж энэ их мөнгө тэдний хувьд мөнгө биш байж болох ч эгэл жирийн иргэд ямар мөнгө болох нь ойлгомжтой бөгөөд мэдээж тэдний биш бидний халааснаас гарч байгаа нь бүүр ч ойлгомжтой хэрэг.

Шинэхэн ажлаа аваад үнэтэй машин тэрэгнээс татгалзаж, дуудлага худалдаагаар зарж шоу хийгээд байсан Э.Бат-Үүл томилолтондоо 60 саяыг зарцуулж бас төсвийн мөнгөөр туйлсан. Үүнийг мөн л манай Ерөнхий сайд давтлаа. АН-ын хэдэн нөхдүүд цувралаар дуулиан дэгдээж, түүнийг дагаад цуурхал ч бас энд тэндгүй. Эхний дуулианы эзэн өнгөрсөн бямба гаригийн өглөө Берлины чиглэлд нисч, сураггүй боллоо. Энэ үзэгдэл нь манай улстөрчдийн гэм биш зан болжээ. Ерөнхий сайд асан С.Баяр АНУ-ыг зорьж, нударга зөрүүлсэн, МАН-ыг уналтад оруулсан гэх шалтгаанаар гишүүний ажлаа өгсөн У.Хүрэлсүх мөн л БНСУ-ыг зорьсон. Ийм маягаар асуудлыг намжаах гэсэн оролдлого бүтэхгүй гэдгийг сануулах нь зүйтэй байх. Монгол хүн бүрийн зүрх сэтгэлд мөнхөд хадгалагдах байх.

Харин энэ цувааг Н.Алтанхуяг үргэлжлүүлэх эсэх тодорхой бус. Түүнийг Ерөнхий сайдын суудлаас буулгах гэсэн хүсэлтэй хүмүүс нэлээдгүй байхад дарь нь дээр давс гэгчээр ийнхүү асуудлыг араасаа цувруулж, өөрийгөө шулуун замд нь оруулчих шиг боллоо гэж дүгнэх хүмүүс ч олонтоо.

Хүн бүхэн энэ мэдээг сонсоод Сэлэнгэд болсон эмгэнэлт үйл явдал болох эх хүү хоёртой холбон тайлбарлаж, “үрээ тэврээд урссан эх, ууланд авирсан Ерөнхий сайд хоёр ижил эрхтэй” хэмээн үзэл бодлоо илэрхийлж байна. Ингэж бичиж, ярьж бухимдаж байгаа арга ч үгүй биздээ. Төр засгийнхан харсаар байгаад үрийг нь  тэврүүлээд урсгасан хойно.

Энэ ч бас яахав. Н.Алтанхуягийг аврах эрлийн багийн ажлын явагдаж байхад араар нь Цаг уур газрын даргыг ажлаас халах асуудлыг хэн нь бас ярьдаг байна аа. Зүгээр ажлаа хийгээд явж байгаа нэгнийг өөрсдөө дур мэдэн дуртайдаа явсан тэдний өмнөөс буруутгах ийм ёс монголд баймааргүй. Энэ бол Н.Алтанхуягийг тойрон хүрээлэгчдийн хийж байгаа л ажил байх. Эрхэм сайддаа хир халдаахгүй гэсэн нэгэн сайдаа хайхын оронд угтал ажил болгож буруутгах хайх хэрэг байгаа ч юм үү бүү мэд.

Ямар ч байсан сайд эсэн мэнд олдож, мангай тэнийлгээд байна. Харин биеийн байдал нь тааруу байгаа тэдний заримыг нь Баяннуурын эмнэлэг рүү явуулж, харин Ерөнхий сайдыг “Сайд” нарын гэх тодотголтой Клиникийн II эмнэлэгт хүргэсэн. Ингээд бас дуулиан.

Учир нь тэнд түүний “найз” МАХН-ын дарга Н.Энхбаяр түүнд хэвтэн эмчлүүлэгдэж байгаа. Бөөн дуулиан тарьж байж тус эмнэлэгт хэвтэн эмчлүүлэхэд эмнэлгийн удирдлагын зүгээс “Төрийн тусгай хамгаалалтын дагуу төрийн тусгай хамгаалалтын нэг, хоёрдугаар зэрэглэлд багтах зочдыг хүлээн авах боломжгүй” гэж мэдэгдэж байсан. Гэтэл одоо энэ зэрэглэлд багтах Ерөнхий сайд маань Клиникийн II эмнэлэгт хэвтэн эмчлүүлж байна. Хүний эрүүл мэндийн асуудал хурцаар яригдаж байгаа энэ үед хууль зөрчсөн гэх асуудал ярих нь ёс зүйгүй ч гэсэн тэдний гаргасан шийдвэр ийнхүү өөрсдийн толгой дээр лүндэн болж буулаа. Урт хэл хүзүү ороон гэдэг шиг панаалтай шийдвэр ийнхүү тэднийг насан туршийн онигоонд орууллаа.

Б.Тогтох Эх сурвалж: Shuurhai.mn