“Эрдэнэт”-ийн захирлаар 2000-2007 он хүртэл ажиллахдаа их хэм­жээний хөрөнгө,

мөнгө хувьдаа  завш­сан гэх хэрэг нь сөхөгдөөд Х.Наранхүү гишүүнийг сандаргаад цөөнгүй сар болж байна. Гэтэл өчигдрөөс түүний хувьд тэнгэр муухайрч прокурорын байгууллагаас түүнд таслан сэргийлэх арга хэмжээ авахаар болжээ. Шалгах зүйл их байгаа юм байх. Нэр төртэй УИХ-ын гишүүн  хүнийг хоёр адуу хулгайлсан сайн эртэй адилтгаж, оргоод алга болчихно гэсэн үү, улсын хилээр гарахыг хориглосон нь ч нэгийг хэлнэ.

Бас түүний нэр дээрх эд хөрөнгийг  ч битүүмжилсэн гэнэ. Хуулийн хүрээнд таслан сэргийлэх ийм алхам хийх болсноо  “Наранхүү” ажиллагаанд хяналт тавьж байгаа про­курор нь дарга нартаа албан бичгээр мэдэгджээ. Бүрэн эрхийг нь давж л чадвал Х.Наранхүүг сэжигтнээс яллагдагч болгоход тун ойртсон бололтой. Авлигатай тэмцэх газрынхан түүнийг буланд тун сайн шахсан дуулдлаа.

Харин Дундговиос 2008 онд парламентын гишүүн болсон тэрбээр энэ бүхнийг мэдсэн шинжгүй адуу, айраг эргүүлсэн шиг яваа аж. Тэр ч байтугай “Наадах чинь хаа нэгтээгээс зохион байгуулалттайгаар тараасан ташаа мэдээлэл байна. Би тойрогтоо ажиллаад завгүй явна.” гэж жишим ч үгүй ярьжээ.

Дундговийн “юмтай” хоёр Наранхүүг нутгийнхан нь “Мон Уран”-ийн,” Эрдэнэт”-ийн гэж ялгадаг юм гэсэн. Бас нэг онигоо ч байдаг. Монголд ирсэн нэг орос дарга “”Эрдэнэт” Наранхүүгийнх юм уу, Наранхүү  “Эрдэнэт”-ийнх юм уу” гэж асуусан юм гэсэн. Яах аргагүй, Ш.Отгонбилэгийн дараа түүний нэр энэ үйлдвэртэй холбогддог. Сүүлийн жилүүдэд хурдан моринд сүжрэх болсон “Эрдэнэт”ийн Х.Наранхүү ги­шүүн ямар ч гэсэн энэ удаа нэг юманд орооцолдох нь ч орооцолдож ээ.

Хийх ажил­гүйдээ, хуулийнхан түүнийг зү­­гээр суулгахгүй “Х.Наранхүү” ажил­­лагаа явуулж байна гэхэд хэн ч ит­гэм­гүй. Бас ч үгүй тухайн үед ТӨХ-ны дарга байсан, Монголбанкны ерөн­хийлөгч Л.Пүрэвдорж, ТӨХ-ны дарга Д.Сугар нарын хэд хэдэн хүнийг араа­саа дагуулж мэдэхээр байгаа аж. “Баян хүнийг балаг тойрохгүй” гэ­дэг шиг хуулийнхны овоо хараанд өрт­сөн УИХ-ын гишүүдийн буухиаг Х.На­ранхүү ийн үргэлжлүүллээ. Үйл яв­дал цаашид хэрхэхийг харж л суухаас..

“Улс төрийн тойм”