Тэрбээр улс төр, бизнес хоёрыг хослон баригч өнөө цагийн лидер.

Түүнчлэн түүнд Монголын шууданчдын холбооны ерөнхийлөгч, Монголын тээвэрчдийн нийгэмлэгийн тэргүүн, Монголын автомашин, мотоциклын холбооны ерөнхийлөгч, Монголын хүүхдийн сагсан бөмбөгийн холбооны ерөнхийлөгч, Монголын “Морин поло”-гийн ерөнхийлөгч зэрэг олон арван гуншин бий.

Мөн “АПУ”, “Шунхлай” гэсэн компанийн гүйцэтгэх захирлаар ажиллаж, эдгээр компаниудыг бизнесийн ертөнцийн тэргүүн эгнээнд авчирсан” хэмээн түүний албан ёсны цахим хуудаст өгүүлжээ.

Үнэхээр үнэн үг өгүүлсэн аж. АПУ буюу архи, пиво, ундааны үйлдвэрийг нуруун дээрээ үүрч Монголд монопол болгох замд нь чирч гулдран байж оруулсан хүн бол Г.Батхүү мөн. Харин энэ төрлийн бизнес цэцэглэн хөгжих бүрийд энгийн нэгний амьдрал бөхийж, бөхийсөн нь унтардаг жамтай.

Өөрөөр хэлбэл, эр хүн гэх нэрээ гээж, “хар ус” гударсан архичин цолыг хүртсэн хүн бүр энэ төрлийн бизнесийн өгөөш болсон байдаг. Харин Монголд АПУ гэвэл ус, ундаа нь мартагдаад архи “амтагдах” учиртай.

Энэ нь иргэдийн сэтгэхүйд ингэтлээ нөлөөлж чадсан Г.Батхүүгийн гавьяа мөнөөсөө мөн гэдгийг дахин хэлмээр байна. Тиймээс АПУ-г эрийн цээнд хүргэсэн аав нар монопол гэх “сертификат”-ыг ам байтугай биенээсээ ханхлуулж, хорвоог хоёргүй нүдээр ширтэж явна.

Эл учраас архины хамааралтай болсон иргэдэд болоод ирээдүй хойчдоо тустай хууль бидэнд хэрэгтэй байна. Нийгэмд тэгтлээ их хор хохирол учруулж чадаагүй тамхийг танаж чадсан шигээ, архины амсарыг ч гэсэн хазаарлах хуулийг хүсэмжилж байна.

Харин Г.Батхүү гишүүн өдгөө АПУ-г эзэмшээгүй ч ТУЗ-ын гишүүн гэгдэж буйгаараа, түүнчлэн хууль батлах эрх мэдлийг хумсалж яваа хүнийнхээ хувьд үүрэг оролцоотойгоор нэгдэх учиртай. Түүнийг УИХ-ын ээлжит сунгаад оролцож, гээгдэх шахам гишүүн болсныг хүн бүр гадарлана.

Харин их хурлын босгон дээр бүдрээх бас нэг шалтгаан байсан нь хувийн ашиг сонирхол гээч байсан билээ. Тухайн үед нэр бүхий гишүүд архины үйлдвэртэй хүнийг УИХ-д суулгах сонирхолгүй байгаа гэдгээ хэлж л байсан.

Мэдээж цаад учир Г.Батхүүг өөрийнхөө бизнест тулгарч болох аливаа саад тотгорыг нь эрх мэдлийнхээ хүрээнд таягдан хаях буюу ашиг сонирхолын зөрчил гаргаж магадгүй гэх хар байсан. Тиймээс нэг хэсэгтээ хөнжилдөө жийлцэж, нэгнийгээ бүдрээчих хүсэл хаа хаанаа байсан нь лавтай.

Харин тухайн үед яригдаж байсан “хар ус”-ны хууль саяхан сөхөгдөөд хав дарагдчихлаа. Хэдийгээр боловсруулж байгаа гэх ч хэн нэгний оролцоотойгоор хэлцэгдэхгүй болчих талтай. Тиймээс хамгийн их хардагуулж байгаа Г.Батхүү гишүүн эл хуулийн санаачилгад нэгдвэл хүн бүрийн сэтгэл уужрах гээд байна.

Түүнчлэн төрийн түшээ хүн архины үйлдвэртэй удаа дараа нэр холбогдоод, бүр намтар дээрээ биччихсэн байгаа нь тийм ч сайшаалтай хэрэг биш. Тиймээс олны сэтгэлийг онгойлгож, архины хяналтын тухай хуулийг дэмжиж ядахнаа архин дээр хувийн ашиг сонирхолын зөрчилгүй гэдгээ харуулбал ямар вэ.

Хамгийн сүүлд л гэхэд хорь гаруйхан насны хоёр залуу архи ууж улмаар зургаан давхраас нисэж үхсэн аймшигт хэрэг гарлаа. Харин гэмт хэргийн гаралтын үндсэн шалтгаан нь архи болж, асар олноороо устгагдаж байна.

Тиймээс “монопол” үхлийг хазаарлаж морь, заанаасаа илүүтэй монгол хүний амь насанд анхаараач. Түүнчлэн Г.Батхүү гишүүнийг газрын маргаантай хэмээн цоллодог. Тодруулбал, нийслэлд асар олон газрыг өөрийнхөө “эдлэн” болгосон хэмээн буруушаадаг.

Түүний нэр холбогддог газраас дурьдвал, “АПУ” компанийн хальж орсон Богд хааны ордон музейн газар, “Өргөө”, “Тэнгис” кино театрын хууль бус хувьчлалууд зэргээр эхэлж өөр олон газрын нэрс зурайна.

Гэтэл Г.Батхүү гишүүн 2010 онд УИХ-ын дэд дарга байхдаа “хүүхдийн эмнэлэг барих гэсэн газар олддоггүй” гээд газар шаагаад явж байсан цаг бий. Тухайн үед газрын наймаандаа гаршаад байсан гишүүнд хүүхдийн төлөө гэх сэтгэл дутмаг байсан учраас газар олдохгүй нь дамжиггүй шүү дээ. Морь, уралдаан, машин техник гээд есөн шидийн юманд “нугасаа өгчихсөн” гишүүн гайгүй байршилтай газарт бас л нугасгүй юмдаг.