“Сэлэнгэ” хочит У.Баатаржавт дахин эрүүгийн хэрэг үүсгэн шалгаж эхэлжээ.

Тэрээр өндөр албан тушаалтнуудтай хамтран хотын “А” зэрэглэлийн газрыг хууль бусаар авахыг оролдсон гэх хэрэгт буруутгагдан баривчлагдаад байсан юм.

Гэвч цагдаа, хуулийнхны удирдах албан тушаалтны тусламжтайгаар батлан даалтад гарсан даруйдаа тэрээр бусдын өмч хөрөнгөд халдан танхайрсан байна.

Хуулийнхны мэдээлснээр У.Баатаржав энэ сарын 10-нд Төв аймгийн Эрдэнэ суманд үйл ажиллагаа явуулдаг Чингисийн хөшөөт цогцолбор буюу “Цонжин болдог”-ын зарим эд зүйлийг санаатайгаар эвдэн сүйтгэжээ.

Цогцолбор газрын бүх гантиг чулууг эвдэж, их хэмжээний хохирол учруулсан гэнэ.

Тиймээс Хөдөө аж ахуйн сайд Х.Баттулга цагдаагийнханд гомдол гаргаж хариуцлага тооцохыг хүссэн байна.

У.Баатаржавт холбогдох танхайн хэргийг Төв аймгийн цагдаагийн газрынхан мөрдөн шалгаж эхэлсэн бөгөөд түүнийг Эрүүгийн хуулийн 153-т заасан үндэслэлээр буруутгажээ. У.Баатаржавыг цагдаа нар эрэн сурвалжилж байна.

Д.Болор

ЭХ СУРВАЛЖ: ЗУУНЫ МЭДЭЭ