Улсын  өмчийг хувьд шил­жүүлэхэд гарсан маа­паанууд ар араасаа дуулиан тарьж эхэллээ.

Тухайлбал, “Тэнгис” ки­­но театрын хувьчлал хуу­лийн хүрээнд явагдаагүй гэдэг нь тодорхой болж, үүнд нөлөө бүхий улстөрчдийн нэр холбогдох болсон. Үүнийг дагаад кино театрын эр­­­гэн тойрны газрын булхай ч цухалзах болов.

Гэхдээ энэ хэрэгт нэр холбогдогсод луйвар бул­хай­гаа дарахын тулд хор найруулж эхлээд байгаа тухай эх сурвалжууд ч мэ­дээлэх болсон. Энэ нь ч үнэний ортой.

АТГ-ын мөрдөн шалгах хэлтсийн ажилтнууд “Тэн­гис”-ийн хэ­рэг хэмээх шинэ хавтаст хэрэг нээсэн бөгөөд газрын загалмайлсан эцэг гэж олноо алдаршсан М.Энхболд, УИХ-ын гишүүн Г.Батхүү  мөн зарим нэгэн ги­шүүдийн нэр тодроод байгаа аж.

“Тэнгис” кино театрыг 2003 онд хотын дарга байсан М.Энхболд менежментийн хувьчлалд оруулахдаа хуу­лийн хүрээнд ажиллаагүй гэдэг нь олон нийтэд ойл­гомжтой болсон.

Гэхдээ тухайн үед Солон­госын хөрөнгө оруулагчдад 66 хувийг өгч үлдсэн 34 хувийг нь нийслэлийн мэ­дэлд авч үлдсэн байдаг.

Хамгийн гол нь, хуу­лийнх­ны анхаарлыг татсан гол асуудал нь хотын “А” зэрэглэлийн бүсэд оршдог уг театрын барилгыг маш хямдаар үнэлсэн. Ха­рин газрыг нь сохор зоо­соор ч үнэлээгүй аж. Мөн нийслэлийн өмчид 34 хувь нь үлдсэн манай талаас кино театрын үйл ажил­ла­гаанд ямар ч хяналт тавьж чаддаггүй гэсэн үг. Товчхондоо нийслэл 34 ху­вийг эзэмшинэ гэж цаасан дээр  гарын үсэг зурсан ч бүх эрх мэдэл нь солонгосчуудын талд байдаг. Түүнчлэн энд гарч буй киноны бүх орлогыг солонгос эрхмүүд хуу хамдаг тухай ч  кино урлагийнхан ярьж байсан юм.

Тэгэхээр нийслэлийн эзэмших ёстой 34 хувийн асуудал дашийн шог болно гэсэн үг. Түүнчлэн “Тэнгис” кино театрын урд, хойд талын газрыг хэн гэдэг эрх мэдэлтэн  гартаа оруулж авсан нь өнөөдрийг хүртэл бүрхэг хэвээр байгаа. Уг нь энэ хэсэг газар нийтийн эзэмшлийн талбайд багтдаг юм билээ.

“Тэнгис” кино театрын асуудал олон жилийн өм­нөөс хаалттай бүрхэг байсан учраас Нийслэлийн Өмчийн харилцааны газраас уг хувьч­лалыг дахин шал­гуулж,  төрийн буюу нийс­лэ­лийн өмчийн 34 хувийг 51 хувь болгохоор хөөцөлдөж эхлээд байна. Эл асуудалтай давхцуулж нийслэлийн нөө­цийн газар гэж үзэж байсан “Тэнгис” кино театрын гад­нах нийтийн эзэмшлийн талбай хэн гэдэг хүний гарт орсон байна гэх асуудлыг ч сөхөж, шүүхэд хандаж байгаа боловч түүнийг нь АТГ давхар хянаж, шал­гахаар болсон гэнэ.

Учир нь анхнаасаа зу­раг төслөө хийхдээ усан орги­­луурын бүтцийг гаргаж байсан боловч ажлын явц­даа өндөр барилга болж хувирсныг хүн бүхэн мэднэ. Энэ мэт хариуцлагагүй үйлд­лээс болж нэгэн залуу амиа алдсан гашуун түүх бий. Гэхдээ энэ бүхэнд Чингэлтэй дүүргийн Засаг дарга асан Д.Ганболдын оролцоо маш их.

Тус кино театрын эргэн тойрныг өөрийн эдлэн газар аятай бусдад өгч байсан. Тодруулбал, Д.Ганболд “Тэн­гис”-ийн баруун урд талын газрыг “Жи Ди” гэдэг ком­панид өгөх захирамж гаргасан. Эл захирамжийг гаргахдаа дүүргийн номын сан барина гэж хууль бус зөвшөөрөл олгосон байдаг аж.

Харин зүүн урд талын газар нь  УИХ-ын гишүүн Г.Батхүүгийн ах дүү нарын компани болох “Түмэн занги” ХХК-ийн  мэдэлд олон жилийн өмнө очсон байдаг.

Ямартай ч АТГ-ынх­ны сонорт “Тэнгис” кино театрын хувьчлалд  Г.Батхүү  болон нэр бүхий за­рим нэг улстөрчдийг ямар нэгэн сэжмээр оролцсон нь тодорхой гэх хэд хэдэн баримт байгаа бололтой. Тухайлбал Солонгосын хөрөнгө оруулагчид нутаг буцахдаа манай нэгэн ком­панийн захиралд 66 ху­вийн эзэмшлийн эрхээ бэлэг­лэсэн тухай яриа гадуур гарах болсон.  Энэ нууц ноёнтоны ард байгаа хүнийг  Г.Батхүү гэх юм билээ.

Нийслэлийн Өмчийн харилцааны газрын дэд дарга Т.Батдоржоос тус барилгын хувьчлалын талаар асуухад “Кино театрын хувьчлал анхнаасаа буруу явагдсан нь тодорхой байгаа шүү дээ. Товчхондоо хотын өмчөөс 100 хувийг нь “Май, та нар ав” гээд өгсөн болохоор сонин сонсогдож байгаа биз.

Уг нь цагтаа “Ялалт” гэдэг нэрээрээ байхдаа 100 хувь нийслэлийн өмч бай­сан юм билээ. “А” зэрэг­лэлийн бүсэд байрлал сайтай газартай байхад хот өөрийн эзэмшлийн хувиа 34  хувь болгож бууруулж болохгүй биз дээ. Угтаа бол 66 ху­вийг Солонгосын компани эзэмшинэ гэдэг бол илт хууль зөрчсөн шийдвэр.

Манай зүгээс дээрх өмч хувьчлалын  хэргийг    хуу­лийн байгууллагаар шал­гуулах нь зүйтэй гэж бодож байгаа. Нөгөө Солонгосын компани нийслэлийн өм­чид хөрөнгө оруулчихаад Монголын хөрөнгө оруу­лалт­тай нэ­гэн компанид эргүү­лээд өөрийн 66 хувийг зүгээр л бэлэглэчихсэн байх жи­шээ­тэй.  Тэгэхээр энэ хууль бус өмч хувьчлал нэг юм хэлээд байгаа биз.

Нийслэлийн Өмчийн харилцааны газрын удирд­лагууд энэ асуудлыг ярил­цаад эхэлчихсэн. Бид эхний ээлжид хотын эзэмшлийн хувийг 51 хүргэхийг  шаар­дана. Хотын өмч байсан театрын нүүр царайг ху­вир­гаж хувьдаа авсан эрх­мүүдийг зохих хуулийн байгууллагууд нь шалгах байх” гэлээ.

Ямартай ч албаны хүний хэлж буйгаар нэр зааж тодорхой яриагүй ч хуурамч хувьчлалаар хувьдаа их мөнгө завшсан эрхмүүд өдгөө ил болоод байгаа. АТГ-аас хууль бус хувьчлалд оролц­сон эрхмүүдийг шал­гахаар болсон нь зарим нэгэн улстөрч эл хэрэгт шууд татагдах магадлалтай юм билээ.

“Тэнгис”-ийн хувьч­ла­лын асуудлаар нэр бүхий ги­шүүд болон Г.Батхүүг шал­гах бололтой.

Эх сурвалж: Өглөөний сонин