“Оюутолгой” компанийн хувь нийлүүлэгчдийн хурал өнөөдөр өөрийн  компанийн байранд 14 цагт болох гэнэ. Харин хурал цагтаа эхлэх үү хойшлогдох уу гэсэн асуудал олон хүний дунд хүлээлт үүсгээд байна.
Хориод хоногийн өмнө Их тэнгэрийн амыг “эзэгнэн” хуралдсан Оюутолгойнхон зарим асуудлаар харилцан тохиролцолд хүрээгүйгээс гурван өдөр Монгол улсын Засгийн газартай маргалдсан билээ. Энэ бүхний дараа их хурлын гишүүдийн дийлэнх буюу 40 гаруй гишүүн Оюутолгойн гэрээний талаар эргэн сөхөж хэлэлцэх асуудлыг гарган ирж санал хураан гарын үсэг цуглуулаад байгаа юм. Тэгээд ч Оюутолгой Монголын талд урьдчилан өгсөн 250 сая доллараа эргүүлэн нэхсэн тухай мэдээлэл ч цацагдсан. Энэ удаагийн Засгийн газар дэлхийн банкнаас их хааныхаа нэрээр авсан зээлнээсээ хэрвээ Оюутолгой “дургүй хүргээд” байвал төлж л орхих байр суурийг цухуйлгаад авсан. Одоо харин Оюутолгойг нэг мөр эцэслэн цэгцлэж байж ерөнхийлөгчийн сонгуульд ялалт байгуулах эсэх нь Засгийн газарт тулгараад байгаа учир хөрөнгө оруулагч гадны компаниудтай “нууц” хэлэлцээр хийж байгаа сураг ч байна. Оюутолгой урд урдын засгийн газруудтай тохиролцолд хүрч нилээн хэдэн жил Монголын баялагийг элдэв шалтаг заан одоохондоо ашиглаагүй дээж авч үйлдвэр барьж байна боловсруулахаараа тодорхой хэмжээний хувьцааны ашиг өгнө гэж мадалсаар сонгуулийн амлалтаа биелүүлэх гэсэн улс төрчдийн амыг хааж байсан бол энэ удаа нилээн хэцүүхэн асуудалтай тулгарах нь тодорхой болжээ. Оюутолгойн хувьд сүүлийн ганц сарын хугацаанд өөрсдөөс шалтгаалсан хэд хэдэн ослоо нуун дарагдуулахыг хичээж байгаа ч булавч бултайна гэдгийн үлгэрээр мэдээллийн эх сурвалжуудаас улам л тодорхой баримттайгаар дэлгэгдэн гарч ирж байгаа учир хэвлэл мэдээллийн хэрэгсэлүүд, сэтгүүлчдийг утсаар загнах нь ч ихэсчээ. Өнөөдөр болох хувьцаа эзэмшигчдийн хурлаар чухам юугаа хэлэлцэх талаар ихээхэн нууцалж байгаа бөгөөд хэрэв Оюутолгой сүүлийн үеийн байдлаа тэр дундаа Монгол ажилтан ажилд авахгүй түр харзнаж эхэлсэн, осол их гарч байгаа, ажилчдын цалин хөлсний эрс тэс зөрүүний талаар хэлэлцэх нь тодорхой хэмээх бор шувуу жиргэж эхэллээ.