УИХ-ын гишүүн Л.Эрдэнэ­­чимэг нарын са­наачлан батлуулсан “Там­хи­ны хяналтын тухай хууль” хэрэгжиж эхлээд долоо хонож байна.

Хуулийн тө­сөл хэлэлцэгдэж эхэлсэн ца­гаасаа багагүй мар­гаан, мэт­гэлцээн дагуулсан ч яг амьдрал дээр хэрэгжээд эх­лэнгүүтээ манай иргэдийн сэтгэлгээний тэлэлт, зөв зохис­той, соёлтой амьдралыг талархан дэмжиж байгаа нийгмийн хүлээлт байсныг батлан ха­рууллаа.

Өглөө ажилдаа ирэх бүртээ МУБИС-ийн өмнөх яв­ган хү­ний замыг цэвэрлэн зогсох эртэй таардаг. Сарын өмнө бол байнга л хөмсөг зангидаастай  “Цаагуур той­­роод яваач” хэмээн уур­тайхан  хог, тамхины иш шүүрдэн зогсдог байсан ах хүү сүүлийн өдрүүдэд нүү­рэнд нь бага зэрэг мишээл тодорчихсон урамтай гэгч нь багахан хогийг хамж зогсдог болжээ.

Түүний бөөгнүүлсэн хо­гийг харвал хуучин шиг овоорсон тамхины иш алга. Жигнэмэг, бохь, чихрийн  цаас төдийхнийг цуглуулан шуудай руугаа  хийх ах хүү­гээс  “Ойрдоо хог багатай бай­на уу” хэмээн асуувал “Энэ ажлыг хийснээс хойш ийм бага хогтой байсан үе ерөөсөө байхгүй. Тамхины эсрэг хууль гаргасан УИХ-ын гишүүддээ талархаж байна. Монголын хууль, гууль болдог үе өнгөрч байх шиг байна. Ах нь их баяртай байгаа” гэж байв.

“Тамхины хяналтын тухай хууль” хэрэгжиж эхэлсэн долоохон хоногт Улаан­баатарчууд иргэний үүрэг, хариуцлагаа бахар­халтай сайхнаар ойлгож, Монгол Улсад хууль хэ­рэгж­дэг юм шүү гэдгийг хавь ойртоо болоод өөрөө өөрсдөдөө харуулж эхэлсэн нь ирж яваа сайн цагийн эхлэл яах аргагүй мөн буй за.

Улаанбаатарт амьдарч бай­­гаа  монголчууд төдийгүй гадны иргэд ч “Тамхины хяналтын тухай хууль”-ийг бие, сэтгэлээрээ мэдэрч эхлэв.

Төрийн ордонд хоёр өдөр үргэлжилсэн “Монголын эдийн засгийн форум-2013”-д оролцож байсан Вьет­нам улсын нэгэн иргэн чуулганы завсарлагаанаар  Төрийн ордны арын тамгатай хө­шөөний дэргэд тамхилж байгаад ордны хамгаалагчдад баригдаж тэр дороо 50 мян­ган төгрөгөөр торгуулж ха­рагдсан.

Олон үггүй түрүүвчнээсээ таван ширхэг 10 мянгат гарган ирж торгуулиа төлсөн вьетнам эр хээгүйхэн инээж байна лээ. Хууль ийнхүү хэрэгжиж байна.

Саяхан л “Монголын хууль гууль болжээ” хэ­мээх таагүй хэлц үгэнд их бага­гүй итгэцгээчихээд, өөрс­­дөө хуулиа дээдэлдэггүй хэ­нэг­гүй, хайнга зангаа бул­зааруулдаг олиггүй хэв­шил тогтоод байсан.

Харин өнөөдөр байдал өөр болжээ. Өчигдөр оройхон  Багшийн их сургуулийн өмнөх атобусны буудлын сандал дээр урт гаансаар тамхилж суусан өвөөд цэр­гийн сургуулийн сонсогч залуу “Өвөө тамхины эсрэг хууль гарсан. Та энд тамхи татаад байвал удахгүй таныг 50 мянган  төгрөгөөр торгоно шүү” гэвэл өнөөх өвгөн “Өө харла тийм болсон уу. Өвөө нь хөдөөний хүн. Торгуульд өгөх тэр их мөнгө ч байхгүй” гээд бушуухан гаансаа тү­рүйлж харагдсан.

“Тамхины хяналтын тухай хууль” хэрэгжиж эхэлс­нээр Улаанбаатар жин­хэнэ ёсоор Азийн цагаан дагина болох зам мөрөө засч эхэллээ. Хүмүүсийн сэт­гэхүй, ялангуяа оюутан за­луусын их хотоо, нэр төрөө эрхэмлэх сэтгэл гайхмаар өөрчлөгдөж байна.

Одоо  тэд  тун  саявтархных  шиг  тав,  зургуулаа бөөг­нөрөн зогсож, тамхины утаан дунд сүүтэгнэлдэхээ больц­гоож байна. Гудамжаар  тамхи зуун хээв нэг  өнгөрдөг бай­сан охид өөрсдөөсөө, бас Улаан­баатарчуудаас ичиж, эмээх цаг иржээ. Монгол хүний хувиа хичээмтгий, бусдыг үл хүндэтгэдэг  бүдүү­лэгдүү зан байдал  үндсээрээ өөрчлөгдөж эхэл­лээ.

Зөвхөн “Тамхины хя­налтын тухай хууль”-иар илрэн гарч байгаа монгол хүний цээжний цаана нууг­дан байсан нийтэч, хамтач, улс орноо гэсэн, Улаан­баатараа гэсэн чин халуун сэт­гэл бадамлаад эхэллээ. Улаан­баатарчуудын дотор сэт­­гэлд зүүрмэглэн байсан сайн цагийн мянган бурхан мэлмийгээ нээж, сэтгэл цэл­мэтэл инээмсэглэн байна.

Монгол Улсад хууль, гууль болдог бусармаг цаг түүх болж байна.

Эх сурвалж: Өглөөний сонин