Өнгөрсөн амралтын өдөр буюу 3 сарын 3-нд АСА циркэд “1000 ээжийн хуралдай” болж өнгөрлөө. Уг хуралдайд орон нутаг, нийслэлийн 2000 орчим ээж оролцож нийгэмд тулгамдаад байгаа асуудал, тэр ч бүү хэл Монголын ард түмний өмч болох Оюутолгойг тойрсон асуудлаар хэлэлцлээ.
Ээжүүд хуралдайгаас гарсан шийдвэрээ эмхэтгэн Ерөнхийлөгч Ц.Элбэгдоржид өнөөдөр өргөх бичиг болгон хүргүүлэхээр болжээ. Тэд ядуурал газар авсаар байгаад Улс орны Ерөнхийлөгчийн хувьд анхаарал хандуулахыг уг өргөх бичигтээ дурьджээ. Мөн Ардчилсан гээд байгаа манай оронд хүчирхийлэл газар авч хүний болон эд эрхтний наймаа газар авч байгаад эмзэглэж байгаагаа ч мөн дурьдсан байна. Эхчүүдийн өргөх бичиг “Монгол улсын Ерөнхийлөгч Ц.Элбэгдорж танаа. Монголын эхчүүд эмэгтэйчүүдийн төлөөлөл эх орныхоо өнцөг булан бүрээс улсынхаа нийслэлд хуран цуглаж анхдугаар хуралдайгаа хийлээ.

 
1. Өвөг дээдсээс бидэнд өвлүүлсэн газар нутгаа бүрэн бүтнээр нь үр хойчдоо үлдээхийг эхчүүд хүсэж байна. Эрхэм Ерөнхийлөгчөө!
Хариуцлагагүй уул уурхайн хөрс хуулалтын шороон хэрмэнд шахагдаж ханаа шийрлэх нутаггүй, үнэгүй шахам гадагш урсаж байгаа монголын баялгийн тоосонд дарагдаж амьсгалах агааргүй, гадныхныг хөлжүүлсэн монголын баялгийг угааж гол мөрнөө устгаж уух усгүй болсон, ухсан нүх, элсэн цөлийг үр хойчдоо үлдээхийг хүсэхгүй байна гэж эхчүүд Танд хэлж байна.
2. Ардчилсан Монгол оронд хүчирхийлэлгүй, айх аюулгүй, амгалан тайван амьдрахыг эхчүүд хүсэж байна. Эрхэм Ерөнхийлөгчөө!
Монголчууд архин далайд живж, хулгай дээрэм, луйвар, хүчирхийлэл хэрээс хэтэрч, хяналтаас гарлаа. Архинд согтож ухаанаа алдсан зэрлэгүүд надад нас байна. Элбэгээ намайг өршөөнө гээд хотонд орсон чоно шиг хүн ард руугаа мэс бариад дайрдаг боллоо. Ээжийн нялх охиныг хүчирхийлж, охид бүсгүйчүүдийг хүний наймааны золиос болгож, монголын хойч үеийг сөнөөж байна. Гэр бүлд хүчирхийлэл гүн гүнзгий бугшиж охид эмэгтэйчүүд, хүүхэд, хөгшид амь насаа алдаж, эрүүл мэндээрээ хохирч байна. Баялагаа гадагшаа зөөх нь багадаад харийханд монгочуудынхаа эд эрхтэнийг наймаалдаг боллоо. Хэмжээгүй баяны зөвшөөрөлгүй барилга дээрээс төмөр унаж, замын цагдаад танилтай согтуу жолооч хажуунаас дайраад, харамч эзэд, хариуцлагагүй захирлуудын үйлдвэр уурхайн ослоос болж дайн дажинтай бүс нутагт амь үрэгдэж байгаа хүнээс илүү тооны монгол хүн энх амгалан монгол нутагтаа үрэгдсээр байна. Эдийн засаг өслөө ч ард түмэн нь ядуу байдаг, ардчилал хөгжлөө ч амьд явах баталгаагүй, айдастай нийгэмд амьдарч үр хүүхдээ өсгөмөөргүй байна гэж эхчүүд Танд хэлж байна. Олон жил амласан ажилтай орлоготой амгалан тайван амьдралаа хайрлаач гэж эхчүүд Танаас гуйж байна эрхэм Ерөнхийлөгчөө!
3. Улс төрийн хоригдолгүй, аливаа хэлмэгдүүлэлтгүй монгол оронд аж төрмөөр байна гэж эхчүүд Танаас шаардаж байна эрхэм Ерөнхийлөгчөө!
Хүний эрх, эрх чөлөөг хязгаарласан агуулга бүхий монгол улсын нэгдэн орсон иргэний болон улс төрийн эрхийн тухай олон улсын пактын заалтад нийцээгүй хуулийн олон зүйл заалт өнөөдөр монголд үйлчилж байна. Энэ нь хууль хяналтын байгууллагууд дур зоргоороо авирлаж иргэдийн эрх чөлөөг хохироох нөхцөл болсоор байна. Монгол улсын үндсэн хуулиар баталгаажсан амьд явах, эрүүл мэндээ хамгаалуулах эрхээ эдэлж чадахгүй олон мянган хүн наранд ч нарсанд ч байсаар байна. Монгол улсын гурав дах ерөнхийлөгч, МАХН-ын дарга Н.Энхбаярыг зарим улс төрчдийн захиалгаар хууль, шүүхийн байгууллагын зарим хараат хүмүүсийн шийдвэрээр хилс хэрэгт холбож, ялд унагалаа.
МАХН-ын дарга, МАХН-МҮАН-ын Шудрага ёс эвслийн тэргүүн Монгол улсын гурав дах Ерөнхийлөгч Н.Энхбаярыг нэн даруй суллаж, хилс хэргийг хэрэгсэхгүй болгон, нэр төрийг нь сэргээхийг монгол ээжүүдийн Их Хуралдайд оролцсон эхчүүд, эмэгтэйчүүд Танаас хүсэж байна. Эрхэм Ерөнхийлөгчөө!
Өр нимгэн эхчүүдээ бодож, өргөн олон түмнээ хүндэлж, өргөх бичгийн минь хариуг 2013 оны 4 дүгээр сарын 5-ны өдрийн дотор өгч, эхчүүд бидний сэтгэлийг амраана гэдэгт итгэж байна

Монгол ээжүүдийн анхдугаар хуралдайн төлөөлөгч 1427 ээжийг төлөөлж, Монгол ээжүүдийн анхдугаар хуралдайг санаачлагч Алдарт эх А.Одончимэг” гэжээ.