Авлигын эсрэг ажилладаг төрийн бус байгууллага сэтгүүл зүйн салбарт ч бий. “Авлигатай тэмцэх сэтгүүлчдийн клуб” хэмээх энэ байгууллага 2007 оноос өнөөг хүртэл ажиллаж байна. Сэтгүүлч Б.Отгонбаярын санаачлан байгуулсан тус байгууллага нь иргэдийн дунд авлигаас урьдчилан сэргийлэх, соён гэгээрүүлэх чиглэлээр нэлээд зүйл хийжээ. Тэдний “Манай клуб.com”  сайтаас энэ төрлийн анализ нийтлэлүүдийг унших боломжтой юм. Гэвч 2013 оны нэгдүгээр сараас сэтгүүлч Б.Отгонбаярын хувийн фэйсбүүк, твиттерийг хэн нэгэн этгээд байнга хаадаг болжээ. Тэрбээр фэйсбүүк,твиттерээ хаалгамагцаа дахиад л шинээр нээсээр. Гэвч хакерууд хаасаар байгаа аж. Ийнхүү тэрбээр нийтдээ 10 гаруй фэйсбүүк, твиттерээ хаалгаад байна. Харин тус клубынхэн тэдгээр хакеруудыг илрүүлэх ажлыг  нэлээд чамбай зохион байгуулж, саяхан зарим  эздийг нь олжээ. Авлигатай тэмцэх сэтгүүлчдийн клубын мэдээллийг дамжуулж байсан  фэйсбүүк, твиттер хуудсуудыг  хааж байсан хүмүүсийн нэг нь Монголын лектор төвийн гүйцэтгэх захирал Баатарсүрэн гэгч этгээд байжээ. Монгол улсын Эрүүгийн хуулийн 226 дугаар зүйлд “Компьютерийн мэдээлэл, программыг өөрчлөх, эвдэх, сүйтгэх” гэсэн бие даасан заалт байдаг юм. Энэхүү зүйл ангийн нэгд, “Компьютер, компьютерийн программ, түүний төхөөрөмжийг санаатайгаар өөрчилсөн, эвдсэн, гэмтээсэн, ашиглах боломжгүй болгосон, мэдээллийн сүлжээг сүйтгэсний улмаас үлэмж хэмжээний хохирол учирсан бол хөдөлмөрийн хөлсний доод хэмжээг тавин нэгээс хоёр зуу дахин нэмэгдүүлсэнтэй тэнцэх хэмжээний төгрөгөөр торгох, гурваас дээш зургаан сар хүртэл хугацаагаар баривчлах, эсхүл хоёр жил хүртэл хугацаагаар хорих ял шийтгэнэ” гэж заасан байна. Тиймээс Авлигатай тэмцэх сэтгүүлчдийн клубээс саяхан албан ёсны мэдэгдэл гаргажээ. Уг мэдэгдэлдээ, “Улс төр, бизнесийн бохир бүлэглэлүүдийн гар хөлж болж, тэднээс санхүүжилтээр бидний шударга үнэний төлөө дуу хоолойг хаан боогдуулах гэсэн оролдлого хэмээн үзэхээс аргагүй юм” гэжээ.

Х.Болд