Дүүргийн Засаг даргаар гайгүй хэдэн жил ажиллаж, “Хан-Уулын Загджав” гэгдэх болсон УИХ-ын гишүүн асан Г.Загджав салж бутарсан МАН, МАХН хоёрыг нэгтгэх үйлсэд “морь, нохой мэт хүчин зүтгэхдээ” сар шинийн золголтоо ч умартчихсан харайлгаж яваа гэнэ. Хэзээнээсээ “Н.Энхбаярын хүн” гэгд­дэг түүнийг ясны заргач, шаггүй  зохион байгуулах авьяастай гэлцэнэ.

2008 оны УИХ-ын сонгуульд Хан-Уул дүүргээс нам нэгт Д.Идэвхтэнтэй хамт нэр дэвшиж, зургаахан хүний саналаар өрсөлдөгчөө өвдөг шороодуулж байсан түүнийг улстөрийн бас бус арга, мэх сайтай нэгэн гэх юм билээ.

Улс амьтан  сар шинийн баяраа тэмдэг­лэж, айл хэсч бууз буудсан шигээ явахад мань  Г.Загджав л “Төрөлх нам маань мөхөл, сэхлийн ирмэг дээр байхад Цагаан сар ч яамай байна аа” гэчихээд тун ч албархуу хүн хавтас сугавчилсан шигээ яваа сурагтай.

МАН-ын  Удирдах зөвлөлийн гишүүн Р.Раштай яаруухан уулзтал өнөөх нь угийн амгалан зангаараа ганц хоёр үг амнаасаа унагасан болоод хөөрөг даалин болтол яаруу сандруу Г.Загджавын нүд нь сүрхий том болсноо хар цагаан дуугүй хаалга саваад гарч оджээ. Салаа замын эрхээр салж бутарсан хоёр намаа нэгтгэх хүндхэн ачааг сайн ду­раараа нуруун дээрээ үүрсэн Г.Загджавт  хөөрөг зөрүүлээд тамхилж суух цаг зав байхгүй гэдгийг Р.Раш гуай ойлгоогүй нь тоогүй.

Цагаан сараар цагийн зүүтэй уралдан намынхаа төлөө нойр хоолгүй гүйж явдаг үнэнч эрхмүүд Г.Загджав даргаас эхлээд байдаг л бололтой юм.

Өглөөгий сонин