Ааая. Манайхан ч баавартай шүү. Замын хөдөлгөөнд оролцож явахдаа энэ бааварыг нь бүр илүү их мэдрэх юм. Машиных нь үнэ, хэмжээ томрох тусмаа машины урдуур дайрах, шахах эрх дарх нь нэмэгдэнэ. “Барчихмаар” царайтай нөхөр машинд байвал цонхоо онгойлгоод харааж зүхнэ, ална тална гэж “ерөөнө”.  Өөдөөс нь уурлаж, хэрэлдвэл “замаасаа гараад зогсчих, уулзая” гэж сүрдүүлнэ. Ууртай хоолойгоо сонсгож чадахааргүй бол унаж яваагаа “чарлуулна”.

Энд тэнд “үнсэлцээд” зогсчихсон машины хажууд өнөө баавар бүр их байна аа байна. Жолооч нар нь хоорондоо асуудлаа яриад шийдэхийн оронд юу юугүй утас руугаа гар нь явж орхино. За, тэгээд л машиныхаа хажууд бага зэрэг ярвайлттай царай гаргачихаад хэн нэгэн рүү ярьж эхлэнэ дээ. Бодвол том замын цагдаа найз руугаа ярьдаг биз. Ингээд л хэн нь том найзтайгаа мэдэлцэх гэж үзэж таарна. Уг нь бацаан байхад “араа дагуулаад ир” гээд л жаалуудад томордог байлаа шүү дээ.Тэгэхээр өөдөөс нөгөө муу бацаан “хөөе чиний ар хэн юм. Минийх тэр ах” гээд л. Ингээд л хэн мундаг “артай” болж бааварласан нь бараг ялагч болно гэсэн үг. Нас явсан ч сэтгэлгээ нь хуучиндаа байсаар байгаа болоод л тэр.

За бас, замын цагдаа гэж нэг бааварлагч хааяа тааралдана. Дохиураа дохичихоод ирэхгүй. Ирэхээрээ ёсолсон болж үнэмлэх авчихаад яваад өгнө. Яах гээд байгаа нь мэдэгдэхгүй. Дүрэм зөрчсөнийхөө төлөө цагдаагын эхнэрийг ажлаас нь авч, дэлгүүр хэсүүлэхэд такси болох зэрэг шийтгэл энүүхэнд. Доромжилно, айлгана, зөөлгөнө. Ийм болохоор л шидэт дохиураа дохингуут нь гялс бууж очоод “данжаад” зан гаргахгүй бол болохгүй. Үйлчилгээний ажилтан гэдгээ мартсан цагдаатай цөөн улсын нэг нь Монгол.

Хэрэв энэ зангаа гадаадын аль нэг улсад гаргаад машинаасаа огло харайж буугаад замын цагдаа руу гүйвэл таныг буудаж орхино шүү харин. Гэхдээ машиндаа суугаад цагдааг хүлээх ёстой гэдгийг гадаад дотоод яваагүй ч америк кино их үздэг хүмүүс мэдэж л байгаа байх.

Машинаас буугаад явган алхвал арай бага стрестэнэ. Гэхдээ л бааварлагчид бас л бий. Залуус маань яасан ч их омогтой болчихсон юм. Харц энэ тэр нь ширүүн, зөрж өнгөрөхдөө мөргөлдчихвөл бараг л зодоон болно. Ёстой л “уучлаарай гэдэг үгэн дээр хорголоо тоолно”. Хоолны газар зөөгчийг загнаж, банкинд теллерүүдэд томорно. Бас болоогүй өнөөдүүл нь хувцас муутайг ялгаж, үйлчлэгч цэвэрлэгч гээд загнах хэн нэгнийг олно. Өөрөөсөө дор гэж бодсоноо дээрэлхэж бааварласаар, эрх дархтай нэгэнд долигнож бааварлуулсаар.  Манайхан ч баавартай шүү.

Гудманд нэг хог түүгч иргэн рүү нохой хуцан боргосоор… Бодвол тэр нохой ч гэсэн өөрийнхөө зиндааг харуулах гэж оролдож байгаа бололтой.