Эхнэр нөхөр салахад хэн буруу­тай вэ. Н.Энхбаяр буруу­тай.

Учир нь Н.Энхбаяр бүх зүйлд буруутай учраас тэр. МИАТ-ийн дарга нар авлигын хэрэгт холбогдоход Н.Энхбаярын хамаатан болж таарсан. Ер нь авлигын гэлтгүй ар гэрийн хэрүүл маргаан болсон ч Н.Энхбаярын буруу гээд булзааруулчихаж болно шүү. Яадаг юм бэ, тэртээ тэргүй Н.Энхбаяр буруутай-гаас хойш ингэж байгаа дээр нь хамаг байдаг буруугаа тохоод авдаг хэрэг. Хийсэн үйлийнхээ ялыг эдэлж байгаа Н.Энхбаярын нэрийг барьж олон хүн хэлмэгдэж эхэллээ гэж цуурах юм. Үнэндээ бол хэлмэгдүүлэлтийн аяныг өдөөн турхирсан хүнийг барьчихсан одоо хамсаат­нуудыг нь тол­гой дараалан барьж байгаа хэрэг гэх нэг хэсэг бий. Гэвч буруутай үйл болгонд Н.Энхбаяр буруутай гэвэл зөв зүйл Монгол Улсад маань үлдэх нь үү. МИАТ-ийн дарга нар улсын мөнгө “идсэн” нь үнэн ч тэднийг Н.Энхбаяртай холбоод хөнгөхөн гэгч нь бариад авчихлаа. Ядар­сан нэгнийхээ мөнгийг идсэн задарсан тэр этгээдүүд хэн­тэй холбоотой байх нь хамаа­гүй гагцхүү барьж бай­гаа нь сайн хэрэг юм. Өдөр болгоны хийсэн буруу үйлийн гайг Н.Энхбаяр үүрэхээс хойш хэрэг хийж яваад баригдвал байцаалтаа өгөхдөө “Н.Энхбаяр л буруутай” гэж хэлэх нь байна шүү. Авлигын тороо нэхэж дуусаад баригдсан “үйлчин” даргын хувь заяа бусдын хийсэн үйлдлийн буруу нь болж таарах нь байна. Ер нь тэгээд Монголчууд нэг юмыг өлгөж авахдаа туйлын гаргууд хүмүүс шүү дээ. Тэгэхээр одоо сайн хүний нэрийг мянга худалдаж иднэ гэдэг шиг муу хүний нэрийг хэд ч худалдаж идсэн яадаг юм бэ. Авлигын хэрэгт холбогдсон л бол Н.Энхбаярын хам­саатан хамаатан болж баривчлагдах болоод байна. Намынх нь гишүүд өлсгөлөн зарлаад балрах дөхсөн нь Н.Энхбаярын л буруу юм. Буруутай үйлдэл үрийн цаана алдаа биш Н.Энхбаяр зогсож байгаа гэсэн ойлголт монголчуудын тархи толгойд суучихснаас хойш буруутай л бол буруутай. Хусавч арилахгүй буруутан бол Н.Энхбаяр.    Хэрэв ажил дээрээ алдаа гар­гаад даргадаа загнуулвал Н.Энхбаяраас боллоо. Аав ээждээ загнуулвал мөн л Н.Энхбаяраас боллоо гээд л өөрийгөө тайвшруулж ч болох шүү дээ.

Э.Баясгалан