Эрхэм гишүүд Ерөнхий сайд Төрийн байгуулалтын байнгын хорооны гишүүдэд мэдээлэл өгөх сургаар хамаг ажлаа орхиод тийш гүйлдэцгээсэн аж.

Ерөнхий сайд Засаг дарга нарыг нь батлаж чадахгүй өгөхгүй байгаа нь хөдөө орон нутгаас сонгогдсон УИХ-ын гишүүдийн уурыг барсан тул сайдтан гэгээн дүрээрээ үзэгдэх агшинг алдалгүй барьж авахаар бөөн бөөнөөрөө орж ирцгээжээ.

Өнгөрсөн хугацаанд тэд Засаг даргаа батлуулчих санаатай Н.Алтанхуяг сайдын өрөөнд оочерлосон ч тусыг олоогүй. Тухайлбал Хөвсгөлийн Засаг даргын асуудлаар Л.Энх-Амгалан гишүүн Ерөнхий сайдтай хэд хэд уулзсан бол Н.Номтойбаяр гишүүний Дорнод аймгийн Засаг даргыг яагаад батлахгүй байна гэж асуухын тулд түүнии өрөөнии манаач болтолоо суух өдөр ч гарсан аж.

Тус хурал дээр залуу гишүүн Н. Номтойбаяр анх удаа том дуугарч, баян айлын эрх хүүхдийн зангаа гаргав. Н.Алтанхуяг сайд Дорнодын ИТХ-аас хоёр удаа нэр дэвшсэн Бадамсүрэнг батламжлалгуй АН-ын хорооны даргыг үүрэг гуйцэтгэгчээр томилсон учраас залуу гишүүн ихэд бухимдаж “Бадамсүрэнг хувийн компанитай болохоор нь дэмжээгүй гэдгийг юу гэж ойлгох вэ” хэмээн эгдүүцэхэд Ерөнхий сайд “Би заавал шалтгаан хэлэх албагүй. Ерөнхий сайд Засаг дарга томилох эрхтэй, Та намайг албадах эрхгүй. Энэ асуудал өөрт чинь яг ямар хамаатай юм” гэж сөргүүлжээ.

Үүний хариуд Н.Номтойбаяр гишүүн ахин уурлаж “Би Дорнодоос сонгогдсон гишүүн учраас хамаатай” гэж хэлээд ширээ шаагаад авна лээ. Ерөнхий сайд залуу гишүүн хоёрын маргаан сүүлдээ “Дорнодыг мөнгөөр шуугиулж гарч ирсэн” гэхчлэн үргэлжлэв.

ЭХ СУРВАЛЖ: МОНГОЛЫН НЭГ ӨДӨР