“МИАТ” ХК-ийн зарим удирдлага мөнгө угаасан гэх хэрэгт нэр холбогдов. “МИАТ” ХК 2001 оны аравдугаар сарын 15-наас эхлэн зорчигч бүрийн тийзний үнэ дээр нэмж таван ам.доллар авч эхэлжээ. Тухайн оны есдүгээр сарын 11-ний өдөр АНУ-д аймшигт террорист халдлага гарснаас үүдэн дэлхийн ихэнх улс орны авиа компаниуд дайны эрсдэлийн хураамжийг зорчигчоос авч эхэлсэн байдаг.

Харин “МИАТ”-ийнхэн иргэдээс авсан энэхүү дайны эрсдэлийн хураамжаа гадаадын компани уруу шилжүүлсэн нь ийнхүү хэрэгт оруулсан бололтой. Хэргийн учгаас атгасан ЭЦГ-ынхан өнгөрсөн амралтын өдөр Ч.Хоролсүрэн, Ч.Суурьтогтох, Н.Гантөмөр, Р.Бат-Эрдэнэ, Ц.Орхон, Ү.Цэцэгмаа нарыг баривчилжээ. Түүнчлэн энэ хэрэгт хамааралтай гэх гурван хүнийг давхар сэжиглэж байна.

Цагдан хоригдоогүй гурван хүний нэг нь Төрийн өмчийн хорооны дарга асан, одоогоор Үндсэн хуулийн Цэцийн гишүүнээр ажиллаж буй Д.Сугар юм байна. Үлдсэн хоёр нь Б.Мандахбаяр, Б.Эрдэнэбаатар нарын ах дүүс аж. Тэд оргон зайлсан бөгөөд цагдаагийнхан эрэн сурвалжилж эхэлжээ. Эдгээр есөн сэжигтнээс гадна 10-аад хүн энэ хэрэгт оролцсон байж магадгүй гэнэ.

Мөнгө угаахад хамгийн чухал оролцоотой байсан хүмүүс нь 5122945 гэрчилгээтэй “Монголиан эйр транспорт” группийн захирлууд аж. “Монголиан эйр транспорт” групп нь “Монгол алтай ресорсез”, “Гобиресурс девелопмент”, “Шууд” телевиз, “Shuud.mn”, “Чингис ресоурс”, “Монгол керамик”, “Виточино” зэрэг 23 аж ахуйн нэгжийг эзэмшдэг юм байна.

Тус группийн эзэд “МИАТ” компанийн удирдлагуудтай хамтран хэдий хэмжээний мөнгө угаасан нь эцэслэн тогтоогдоогүй эл хэргийн ард олон тэрбумын хөрөнгө эргэлдэж байгааг ЭЦГ-ын ажилтнууд онцлов. Монголд өмнө нь мөнгө угаасан гэмт хэрэгт бүртгэгдэж байсан ч нотолгоогүй гэдгээр удаа дараа замхарч байсан. Оны өмнөхөн ЭЦГ-ын Эдийн засгийн гэмт хэрэгтэй тэмцэх хэлтсийн дэргэд Мөнгө угаах гэмт хэрэгтэй тэмцэх тасгийг шинээр байгуулсан.

Тус тасаг дээрх хэрэгт эрүүгийн хэрэг үүсгэн шалгаж байгаа нь Монголд энэ төрлийн гэмт хэргийг илрүүлсэн анхны тохиолдол юм. Мөнгө угаах нь аливаа улс орны эдийн засгийн чадавхийг бууруулж, хөгжлийг зогсоодгоороо бусад төрлийн гэмт хэргээс илүү хор уршигтай ажээ.