Ил гаргахгүй байгаа ч битүүхэндээ айж, шөнө нь хар дараад арга алга.

Ардчилсан Ерөнхийлөгчийн нүүрэнд инээмсэглэл ч тодрохоо болилоо. Энэ бол их сунгааны өмнөх эгдүүцэл. Дайснаа дарж, дархан цолоо мандуулсан ч Ц.Элбэгдоржийн сэтгэл тайвшрахгүй нь. Айдас нь ч дарагдахгүй гэдэг нь тодорхой боллоо.
“Дэлхий сөнөх” өдөр улс оронд гэнэтийн гамшиг тохиолдож, харанхуй бүрхээгүй ч Н.Энхбаярын амьдралын хүрд “зогсчихлоо”.

Энэ өдөр түүнийг эмнэлгийн орон дээрээс хорих анги руу шилжүүлэв. Урьдын л адил багтай хүмүүс хөлийг нь гозолзуулаад авч явж харагдсан. Улсын Дээд шүүхийн шийдвэрт хамгийн ихээр итгэж, найдаж байсан ч дөрвөн жилийг нь 2.6 болгож багасгаснаас өөр нааштай зүйл болсонгүй. Намынхан нь ирэх оны Ерөнхийлөгчийн сонгуульд нэр дэвшүүлэх нь зүйтэй гэж шийдвэрлэсэн ч төмөр торны цаана “аж төрөх” болсон түүнд ийм боломж тохиохгүй нь.

Үүнтэй нь холбоотой түүнийг хорих руу “ачсан” хэмээн намынхан ч тайлбарлаж буй. Магадгүй л юм. Юутай ч экс Ерөнхийлөгч Н.Энхбаярын амьдралын хүрд улс төрийн хүрээнд “зогсчихлоо”. Гэсэн ч тэр ардчилсан Ерөнхийлөгчийн айдас хэвээр байна. УИХ-ын гишүүн З.Баянсэлэнгэ “Магадгүй Ц.Элбэгдорж руу дайрахгүй гэх арга байхгүй. Хэзээ нэгэн цагт улс төрийн зорилгоор юу ч хийж болно” хэмээн хэвлэлд ярилцлага өгөхдөө тодотгожээ.

Энэ бол ирэх онд юу ч болж мэдэхийг Төрийн тэргүүнд анхааруулсан эксийн багийнхны сэрэмжлүүлэг ч байж мэднэ. Н.Энхбаярын төлөө жагсаж, өлсөж,  баривчлагдаж байж зөөлөн сэнтийд суусан З.Баянсэлэнгээс эхлээд олон хүн авснаа өгөхийн тулд “хөдөлмөрлөнө”. Үр дүнг нь бодитоор гаргахын тулд бүр ч илүү чармайж ажиллах болно.

Тэгэхээр Ц.Элбэгдорж өрсөлдөгчөө дарсан ч дайсныхаа тоог нэмэгдүүлчихлээ. Мөн Н.Энхбаярт байгаа ганц зэвсэг нь өлсгөлөн зарлах. З.Баянсэлэнгэ гишүүний хэлсэн яах аргагүй зөв. Өлсөхөөрөө айлгаж, үхэхээрээ сүрдүүлнэ, тэр. Энэ бол экст байгаа цорын ганц найдвар, бас “тоног төхөөрөмж”. Муугаар бодож экс Ерөнхийлөгч өлсгөлөн зарлаж, бие нь доройтсоор байвал өнөөгийн Ерөнхийлөгчийн нэр хүнд тэр хэмжээгээр шалны алчуур болж хувирах магадлал өндөр.

МАХН-ынхны хэлж байгаагаар өдөр ирэх тусам турж эцэн, бие нь сульдаж, хоног алдсаар байвал хорвоог орхих магадлал нь нэмэгдэж буй. Хорих руу авч явж буй экст эхнэр нь шоронгийн хоол битгий идээрэй гэж захиж ч байгаа дуулдсан. Тэгэхээр өлсгөлөн зарласаар өнө мөнхөд одвол Монгол Улсын нэр хүнд болоод ардчилсан Ерөнхийлөгчийн “аз”- нд муу. Ийм байхад Ц.Элбэгдорж тайван нойрсож чадна гэж үү.

Мөн түүний өрсөлдөгч ганц Н.Энхбаяраар тогтохгүй. АН-аас гэхээс илүүтэй “Алтан гадас”-аас мандат өвөртлөх их аян түүнийг тосож буй. Энэ бол нам доторх өрсөлдөөн. АН-ын дарга Н.Алтанхуягийн хувьд Э.Бат-Үүлийг ихэд дэмжиж, түлхүүрдэж буй. Тиймдээ ч хотын дарга болох саналыг тавьсан хэмээн улс төрийн хүрээнийхэн шивэр авир хийх нь бий. Ах намынхан мэдээлэлд ойр байдаг хотынхны өмнө нүүр хийх газаргүй болоод удаж буй.

Энэ нь ч сүүлийн хэдэн удаагийн сонгуулийн үр дүнгээр баталгаажина. Энэ удаагийн сонгуулиар л гэхэд нийслэлээс нэг ч суудал аваагүй гэхэд хилсдэхээргүй. Ганц суудал авсанаа алдчихсан. Ийм үед Э.Бат-Үүл шиг сайн хүн одоогоор нийслэлийнхэнд алга. Шуугиан тарьж орж ирсэн шигээ өдөр бүр имижээ бүрдүүлж, нэр хүндээ өсгөж байна. Дугаарын хязгаарлалт хийснээр замын түгжрэл багасаагүй ч том оврын автобус таксинаас хурдан боллоо.

Энэ бол олонх руу чиглүүлсэн бай оновчтой байгаагийн илрэл. Машинтай нь уцаарлаж байхад нийтийн тээврээр зорчих иргэд түргэн шуурхай явж байгаад нь хотын даргад талархаж сууна. Энэ мэтчилэн Э.Бат-Үүл баатрыг сайхан харагдуулах ажлуудыг дурьдаж болно. Харин ардчилсан Ерөнхийлөгчийн нэр сүр Н.Энхбаяраар “харлаж”, Э.Бат-Үүлээр сүүдэрлэгдэж байна.
Л.Нинж

Эх сурвалж: “Нийгмийн Толь”