Японы мэргэжлийн сүмогийн 68 дахь их аварга, Долгорсүрэнгийн Дагвадоржийг халз тулаанд дуудаж хоёр оронд төдийгүй олон орны хэвлэл мэдээллээр дуулиан болсон Канжи Антонио Инокитой их аварга маань өчигдөр уулзжээ. Тэрээр олимпын гурав, дэлхийн 12 удаагийн аварга Япон улсын алдарын баатар Ёошида Саоригийн хүлээн авалтад уригдан очиж тэнд “өрсөлдөгчтэйгөө” таарчээ. Мэдээж хэрэг хамтдаа зургаа ч авахуулаад амжсан тухайгаа их аварга маань өөрөө твиттер хуудсаараа цацсан юм. Аварга твитрээр бичихдээ “Нөгөө өвөөтэйгөө таарсан шүү” гэж хошигнон бичсэн юм.

Түүнийг тулаад дуудсан Канжи Антонио Иноки нь Японы Ёкогамад зургаан хүүхэдтэй баяны гэр бүлд 1943 онд төрсөн нэгэн. Эцэг Сэжиро Иноки нь бизнесмен, улстөрийн зүтгэлтэн Канзиг таван настай байхад нь нас барсан юм байна. Иноки Хигашида дунд сургуульд байхдаа 180 см өндөр болж, сургуулийнхаа  сагсан бөмбөгийн багт тоглож байжээ. Тэр бас хөнгөн атлетикийн клубт бөөрөнцөг шидэж Ёкогамагийн бүрэн бус дунд сургуулийн хөнгөн атлетикийн тэмцээний аварга болж байсан байна. 1957 онд дайны дараа гэр бүл нь  хүнд байдалд орсноос 14 настай Иноки өвөө ээж, ах нартайгаа  Бразилд цагаачилж. Тэр тэнд ч спортоо орхисонгүй  буудлага, жад, зээрэнцэг шидэлтээр хичээллэж буудлага, зээрэнцэг шидэлтээр Бразилийн аварга болсон байна.
Иноки 17 настай байхдаа тухайн үеийн алдарт тулаанч Рикозантай уулзсан байна. Тэгээд эх орондоо ирж Японы тулаанчдын ассоциацид элсчээ. Гэсэн ч тэссэнгүй АНУ-гаар хэсэг яваад 1966 онд Токиод сая Мэргэжлийн тулааны шинэ дэвжээ олж оржээ. Тухайн үедээ эндээ л Иноки  жинхэнэ од байсан байна.
1972  онд тэр Японы Тулааны урлагийн шинэ үеийг үндэслэж, хамгийн эхний тулаан нь Карл Гочийн эсрэг байсан.

Дараа нь 1995 онд япон солонгосын засгийн газар хамтарч  Пеньяанд дэлхийн тулаанчдын хоёр өдрийн наадам зохион байгуулав. Энд Иноки, Рик Флейн нарын тулааныг үзэхээр “Тавдугаар сарын 1” цэнгэлдэх хүрээлэнд 190 мянган хүн цугларч байсан юм.
1976 оны зургадугаар  сарын 26-нд Антонио Иноки дэлхийн хүнд жингийн боксын аварга Мохаммед Алитай тулалдахаар төлөвлөж байсан. Гэхдээ тэмцээн болохоос хоёр хоногийн өмнө дүрмээ өөрчилж рингэн дэх алхаануудыг хязгаарласан. Гэхдээ л 15 үе үргэлжилсэн тэмцээнд тэр хоёр 3:3-ын харьцаагаар тэнцсэн юм.

Эх сурвалж: www.assa.mn