Улсын Дээд шүүхийн хяналтын шатны эрүүгийн хэргийн шүүх хуралдаанаар Д.Энхээд холбогдох хэргийг ялтны өмгөөлөгчийн гаргасан гомдлын дагуу өчигдөр хянан хэлэлцэв. Д.Энхээ нь 2011 оны зургадугаар сарын 29-ний шөнө согтуугаар өс хонзонгийн сэдэлтээр эхнэр Н болон түүний гэр бүлийн таван гишүүнийг алах зорилгоор Чингэлтэй дүүргийн XIX  хороонд оршин суух хадам эцгийнхээ гэрт очсон байдаг.

Улмаар байшингийн дээврийн хонгилоор дамжиж, гэрт нь нэвтрэн иргэн Б-гийн зүүн хөхний доор хоёр удаа, хэвлийн баруун хажуу талд, зүүн далны доор суганы арын шугам орчим нэг удаа хутгалж санаатай хөнөөсөн. Мөн хоёр хүний биед амь насанд аюултай хүнд гэмтэл учруулсан гэмт хэргийг үйлдсэн юм. Түүнчлэн эхнэр Н-ийн  төрсөн дүү 15 настай Ц-г өгзөг тус газар хутгалж, хөнгөн гэмтэл санаатай учруулсан.

Мөн түүний дүү таван настай Х, төрсөн охин хоёр настай Э нарыг ална гэж заналхийлж, хадам эх Б-ийн банкнаас зээлсэн 10 сая төгрөгийг нэхэж, 30 мянган төгрөгийг дээрэмдэж авчээ. Дээрх гэмт хэргүүдийг үйлдэх явцдаа Б-гийн  гэрийн хаалгыг эвдэж, цонхыг хагалан, хохирогч нарын гар утсуудыг санаатай эвдсэн аж.

Үүнээс гадна түүний үйлдсэн гэмт хэргийн талаарх мэдээллийн дагуу ирсэн цагдаагийн ажилтнуудаас автомашин, таван  настай Х-гийн цээж, зүрхэн тус газар хутга тулган, тэднийг насанд хүрээгүйг мэдсээр байж, “ална” гэж заналхийлж, хүн  барьцаалсан гэмт хэргийг тус тус үйлджээ. Чингэлтэй дүүргийн шүүх дээрх хэргийг долдугаар сарын 20-ны өдөр анхан шатны журмаар хянан хэлэлцээд Д.Энхээд цаазаар авах ял оногдуулсан юм.

Мөн Нийслэлийн шүүх уг хэргийг  есдүгээр сарын 25-ны өдөр давж заалдах шатны журмаар хянан хэлэлцээд анхан шатны шүүхийн шийдвэрийг хэвээр үлдээжээ. Харин  Улсын Дээд шүүхийн хяналтын шатны эрүүгийн хэргийн шүүх хуралдаанаар дээрх хэргийг хянан хэлэлцээд анхан болон давж заалдах шатны шүүхээс Д.Энхээд оногдуулсан цаазаар авах ялыг 25 жил хорих болгон өөрчлөв. Түүний биечлэн эдлэх ялын эхний 10 жилийг гянданд, үлдэх 15 жилийг чанга дэглэмтэй хорих ангид эдлүүлэхээр болжээ.
 А.Лхагва

Эх сурвалж: “Нийгмийн Толь”