МУ-ын СТА дуучин О.Баянмөнхийн хуримын бэлгэнд ирсэн дуу

Нийтийн дууны салбарт өөрийн гэсэн өнгө төрх, донж маягаараа ялгаран, хоолойны цараагаараа хэдийнээ бидэнд хүлээн зөвшөөрөгдсөн МУ-ын СТА дуучин О.Баянмөнх өнгөрсөн намар хуримын зар түгээж, 11 сарын 3-ны билэгт сайн өдөр найрласан билээ. Тэрээр Ховд нутгийн бүсгүйтэй гэр бүл болон үрийн зулай үнэрлэж, ажил амьдрал аль аль нь тэгш дүүрэн явна.

Залуу хосын хуримын хамгийн нандин бэлгүүдийн нэг бол дуучин О.Баянмөнхийн уран бүтээлийн андуудын чин сэтгэлийн бэлэг байсан гэнэ. Яруу найрагч Ч.Алтантүлхүүр, Хөгжмийн зохиолч Б. Баасанхүү нар өөрсдийн хамтын бүтээл, шинэ дууг түүнд бэлэглэсэн нь өнөөдөр та бүхний сонорт хүрээд байгаа “Шинэ он инээмсэглэсээр ирлээ” дуу юм байна.Даршамд дуулгахад дуучин О.Баянмөнхийн нэрийн хуудас болсон”Омогшил” дууных нь шүлгийг мөн л яруу найрагч Ч.Алтантүлхүүр бичиж өгч байжээ.

СТА дуучин О.Баянмөнх ийнхүү сарын өмнө бэлгэнд авсан уран бүтээлээ тун ч түргэн хугацаанд клипжүүлж олон нийтэд хүргээд байна.

Түүний урын санд урьд өмнө Шинэ жилийн холбогдолтой дуу огт байгаагүй. Харин “Шинэ он инээмсэглэсээр ирлээ” хэмээх шинэхэн уран бүтээл нь шинэ жилийн уур амьсгал орж байгаа энэ цаг үед сонсогч фенүүдийнх нь захиалан сонсох эрэлт ихтэй дууны нэгээр тодроод байна.

Та ч бас энэ дууг сонсоод үзээрэй. Шинэ жил инээмсэглэсээр ирлээ залуус аа!