“Орчлон” дунд сургуулийн сурагчдаас энэ сарын 10-нд бөөлжих, толгой эргэх, халуурах, гэдэс базлах, гүйлгэх зэрэг нийтлэг шинж тэмдэг илэрч, үдийн хоолноос хордсон байж болзошгүй гэх мэдээлэл гарсан билээ. Энэ асуудлаас үүдэн тус сургуулийн сурагчдын ирц хангалтгүй байгаа тул үйл ажиллагаагаа тав хоногийн хугацаатай түр зогсоогоод байгаа юм. Энэ талаар тус сургуулийн гүйцэтгэх захирал Л.Жаргалмаа “Манай сургуулийн 16 сурагчаас гэдэсний халдварт нян илэрсэн. Үдийн хоолноос хордсон байж магадгүй тул хоолны дээжийг Сүхбаатар дүүргийн Мэргэжлийн хяналтын газар шинжилж байгаа” гэх мэдээлэл өгч байсан юм.

Гэтэл тус сургуулийн сурагчид гэдэсний гоц халдварт цусан суулга өвчнөөр өвчилсөн болохыг ХӨСҮТ-ийн шинжилгээгээр тогтоожээ. Энэ талаар ХӨСҮТ-ийн Тандалт судалгааны албаны дарга А.Амбасэлмаагаас тодруулахад “ХӨСҮТ-ийн зүгээс “Орчлон” сургуулийн сурагчдаас шинжилгээ авсан. Шинжилгээ эцсийн хариу гарч, тус сургуулийн 338 хүүхдээс гэдэсний гоц халдварт цусан суулга өвчний нян илэрсэн” гэлээ.