“Үхэхдээ үхэр буугаа тавихгүй” гэж үг бий. МАХН-ын Хяналтын ёс зүйн хорооноос 40-өөд мянган гишүүнтэй болсноо мэдээлж байсан цаг саяхан. Харамсалтай нь энэ тоо өнөөдрөөс хорогдож эхэллээ. Намын дарга Н.Энхбаярт холбогдох хэргийн давж заалдах шатны шүүх хурал болж өнгөрөв үү үгүй юү тус намын залуу гишүүд намынхаа гишүүнчлэлээс татгалзаж буйгаа илэрхийлж мэдээлэл хийгээд амжив. Орон нутгийн сонгууль ойртож буйтай холбогдуулан албан тушаал горилогсод МАХН-нд шургалж байгааг ч тэд илчилсэн. Энэ намын удирдах албаны гишүүд намын болоод гишүүд дэмжигчдийнхээ эрх ашгийг үл хүндэтгэн, улмаар албан тушаал, амбицийн хойноос хэтэрхий их туйлширч эхэлсэн байна.

“Шударга ёс” хэмээн цээж дэлдэх олон дунд хоёр үзүүртэй зүү шиг нөхөд олон бололтой.

Зарим нь ч МАХН-ын залуусын энэхүү урвалт шарвалтыг өдөөгч нь “үхэхдээ үхэр буугаа тавихгүй” зантай МАН-ын ээлжит “тоглолт” хэмээн харж байна.

“Эцэггүй хүүхдийн толгой том” гэдэг. Өрхийн тэргүүнээ яаж ч чадалгүй “хар гэр” лүү явуулчихсан МАХН-ынхан бужигнаж эхэллээ. Залуу гишүүд нь намаа орхихоо илэрхийлээд байгаа бол удирдлагууд нь хүнд нөхцөл байдлаас хэрхэн ангижрах арга замыг хэлэлцэж өнөөдөр хуралдсан байна. Гэвч нам доторхи эрх мэдлийн төлөөх цусгүй дайн хэдийнэ эхэлсэн сурагтай.

Нийслэлийн шүүхээс намын даргад нь оноосон ялыг хэвээр үлдээсэн явдал тэднийг барьц алдахад хүргэсэн гэх.

Н.Энхбаярын далбаан дор улс төрийн тавцанд дахин ил гарсан нөхөд сүүлийн өдрүүдэд түүний төлөө ганц ч үг ганхийгээгүй гэхэд болно. Хурганы арьс нөмөрсөн чоно мэт аашлагчдад зөөлөн сэнтий, түшлэгтэй сандлаасаа зүүгдэх л чухлаас бус хэнийг хааш нь далд хийх тийм ч сонин биш бололтой.

Ямартаа ч МАХН-ынхан дотооддоо нэлээн асуудалтай, хөл толгойгоо олох гэж сандралдаж буй юм байна.

Э.Энх-Эрдэнэ