Хятадад автомашинд дайруулж, хүнд бэртсэн хоёр настай бяцхан охин ухаан оролгүй байсаар өнгөрсөн шөнө нас баржээ. Хоёр удаа машинд дайруулсан охиныг зам дээр хэвтэж байхад хажуугаар нь өнгөрсөн 18 хүний хэн нь ч эмнэлгийн тусламж үзүүлээгүй бөгөөд эл бичлэг гудамжны камерт бичигдсэнийг интернетэд байршуулсан нь дэлхий даяар олон сая хүнийг эмзэглүүлсэн билээ. Аравдугаар сарын 13-нд болсон дээрх аймшигтай, эмгэнэлтэй явдлын дараа эмнэлэгт ухаангүй хэвтэж байсан Ван Юэй гэгч охин амьд үлдэх магадлал маш бага байсныг эмч нар хэлж байсан юм. Хятадын Гуандунь мужийн Фушань хотод болсон энэ хэргийг үйлдсэн хоёр жолоочийг цагдаа нар баривчилсан талаар шинэ мэдээлэл өнөөдөр хэвлэлүүдэд гарчээ.

Ван Юэй охиныг Фушань хотод ажилладаг аав, ээжийнхээ компьютерийн хэрэгсэл зардаг дэлгүүрийн ойролцоо  явж байхад нь машинаар дайрсан юм. Эмнэлгийн нэгэн ажилтан “Охины тархи үхэжиж, ихэнх эрхтэн нь ажиллагаагүй болсон байсан тул юу ч тус болж чадахааргүй байсан” гэжээ. Охины аав, ээж хоёр Гуандуньд өөр мужаас цагаачлан очсон ажилчид юм байна. Өнгөрсөн шөнө охиныг амьсгал хураасан тухай мэдээ тарсны дараа нэгэн блогч “Диваажинд машин байхгүй. Баяртай Ван Юэй” хэмээн бичжээ. Дээрх эмгэнэлтэй хэргийн дараа Гуандунь мужийн захиргаа зовлонд унасан хүнд туслахыг хуульчлах тухай хэлэлцэж байгаа гэнэ. Гэвч нэгэн интернэт хэрэглэгч “Хүнээ хүн чанартай болгох тухай эхлээд ярих хэрэгтэй. Гэвч үүнд санаа тавьж байгаа хүн байгаа гэж үү?” хэмээн бичжээ. Хүн төрөлхтнийг хүнлэг байхыг хоёрхон насны амьдралаараа ухаараалууд буцсан Ван Юэй охинд сая сая хүн эмгэнэл илэрхийлсээр байна.

“Диваажинд машин байхгүй. Баяртай Ван Юэй”