МАХН-ын дарга Н.Энхбаярт шүүхээс ял өгсөн талаар АН-ын бүлэг өчигдөр албан ёсны байр сууриа илэрхийллээ. АН-ын бүлгийн дарга Д.Эрдэнэбат: Шүүх бол өөрийн үндсэн хуулиар хамгаалагдсан эрх мэдлийг хэрэгжүүлдэг байгууллага. Гэхдээ Монгол Улсад өмнө нь гарч байсан улс төрийн хэлмэгдүүлэлт давтагдах ёсгүй. Ардчилал, хэлмэгдүүлэлт хоёр зохицож болохгүй гэдэг АН болон нийт Монголын ард түмэн санал нэгдэх байх. Бид төрийн ажлыг цааш нь явуулахын тулд эрхзүйн зарим орчныг өөрчлөх шаардлагатай байна. Тухайлбал шүүхийн тухай хуулийн хуучны социалист, шоронжсон тогтолцоог өөрчлөх шаардлагатай байна. Тиймээс бид ИЗНН, МАХН-МҮАН-ын Шударга ёс эвсэлтэй хамтарч эрхзүйн орчны шинэчлэлтийг хийх болно гэж мэдэгдсэнээрээ Н.Энхбаярыг шүүхээс хэлмэгдүүлсэн гэдгийг ил цагаан хэлээд өглөө. Дөрвөн жил дөрөө харшуулах намынхаа тэргүүнийг харсаар байж хэлмэгдүүлэхгүй гэдгээ АН-ынхан ингээд хэлчихлээ. Тэгэхээр Н.Энхбаярт заавал ял өгүүлэх ажиллагааг хэн зохион байгуулсан байж таарах вэ?
Тэр хүн бол мэдээж Ц.Нямдорж. Н.Энхбаяртай эртний хонзонтой. Ямагт өс санаж, шүд зууж явсан Ц.Нямдорж ХЗДХЯ-ны сайдын сэнтийгээсээ мултрахын даваан дээр сүүлийнхээ цохилтыг хийсэн нь энэ байж магадгүй. Н.Энхбаярт ял өгүүлэх нь түүнд болон түүний намынхан маш ашигтай. Улс төрийн хэлмэгдүүлэлтийг төрийн аль нэг институци гаргах аваас засгийн газрын бүрэлдэхүүнд Шударга ёс эвсэл орохгүй гэж мэдэгдсэн. Тэгэхээр ямарч хамаагүй аргаар Н.Энхбаярт ял өгүүлчихвэл АН-ынхантай эвсэхээс Шударга ёс эвсэл татгалзаж, АН хүссэн хүсээгүй МАН-тай эвсэх санал гаргана гэж Ц.Нямдорж  таамагласан бололтой.
Албан бус эх сурвалжийн мэдээлснээр бол Ц.Нямдорж сайд С.Соёмбо-Эрдэнэ шүүгчийн нэг хэргийг илчилнэ хэмээн дарамталсан аж. Юу гэхээр С.Соёмбо-Эрдэнэ шүүгч сургуулиа дөнгөж төгссөнийхөө дараа Баянгол дүүргийн шүүхэд нарийн бичгээр хэсэг хугацаанд ажиллажээ. Тэрээр ийн ажиллаж байхдаа гэмт этгээдийн хавтаст хэргээс баримт сугалж байгаад баригдаж байжээ. Ингээд тэрээр гэм хэрэгтний ялаас зувчуулсан хэргээр буруутгагдаж, дахиж хуулийн байгууллагад ажиллах эрхгүй болон хөөгдөж байсан аж. Энэхүү баримтыг нь мэддэг цөөн хэдэн хүний нэг нь Ц.Нямдорж тул энүүгээр нь нээнтэглэсэн Н.Энхбаярт ял өгүүлж дөнгөсөн бололтой.
  word.mn