Өнөө  орой  20.00 цагаас Лондон-2012 чөлөөт бөхийн эрэгтэйчүүдийн 55 кг-ийн жинд Дэлхийн аваргын мөнгө, хүрэл медальт, Гавьяат тамирчин Б.Наранбаатар хүч үзнэ.

Финляндын Вантаа хотноо болсон олимпийн эрх олгох тэмцээнд зодоглож, Лондонг зорих эрхээ авсан. Зөвхөн алт, мөнгөн медаль хүртсэн тамирчдад олимпйин эрх олгосон тус тэмцээнээс Б.Наранбаатар алтан медаль хүртсэн билээ.
Монголын чөлөөт бөхийн энэ цаг үеийг тодорхойлж яваа тамирчдын нэг Б.Наранбаатар дэлхийн аварга шалгаруулах тэмцээнд долоон удаа эх орноо төлөөлөн оролцсон. Ингэхдээ мөнгө, хүрэл медаль хүртсэн тэрбээр оюутны дэлхийн аварга, оюутан залуусын Универсиад наадмын аварга, Дэлхийн цомын хүрэл, Азийн аваргын мөнгө, “Монгол говь” тэмцээний хошой аварга, Дан Коловын нэрэмжит олон улсын тэмцээн, Тахтийн цомын, ОХУ-ын Буриадын Ерөнхийлөгчийн нэрэмжит тэмцээн, ХБНГУ-д болдог олон улсын тэмцээний алтан медальтай.