Ардчилсан намынхан Ардчилсан засгаа байгуулж ч амжилгүйгээр дахин хагаралдаж эхэллээ.

Эрхэм гишүүн “Фортуна” Н.Батбаяр өчигдөр УИХ-ын чуулганы үеэр УИХ дахь АН-ын бүлгийн дарга Д.Эрдэнэбат тэргүүтэй нөхдийн картыг сугалж аваад гарсан. Үүнийг зарим ажиглагч “Фортуна дүрсгүйтэж байна” хэмээн дүгнэсэн. Гэвч энэ нь эндүүрэл байж. “Фортуна” Н.Батбаяр, УИХ дахь АН-ын бүлгийн дарга Д.Эрдэнэбат нарын хувьд Ардчилсан нам дахь МҮДН фракцийн гол тоглогчид. УИХ-ын гишүүн “Ажнай” Д.Бат-Эрдэнэ, Р.Амаржаргал, Ц.Баярсайхан нарын хувьд ч МҮДН угшилтай. “Фортуна” Н.Батбаяр өчигдөр намынхандаа эсэргүүцэл үзүүлж, фракцийнхныхаа картыг чуулганы танхимаас авч гарсан нь тэр аж. Яагаад тэр вэ.
Ардчилсан намынхан сонгуульд ялмагцаа ялалтын бялуугаа өөрийнхөнтэйгөө, Н.Энхбаярынхантай, М.Энхсайхантайгаа ч хувааж эхэлсэн. Гэвч Н.Алтанхуяг тэргүүтэй тус намын удирдлагууд МҮДН фракцийнханд тун багахан хувь хүртээжээ. “Алтангадас”-ынхан Засгийн газар, Шонхор фракцийнхан УИХ-ыг мэдэлдээ авсан гэж үзвэл ялалтын бялууны хамгийн амттай хэсгийг Н.Алтанхуяг, З.Энхболд нар хүртэж байгаа биз. Түүгээр ч зогсохгүй “Женко” Х.Баттулга, Лу.Болд нарын тэргүүлдэг МоАХ, “Зүүн хойд Ази”-ийнхан нийтдээ таван яамд хяналтаа тогтоож байгаа сураг байна. Бүр тодруулбал: Ардчилсан намынхан Хөгжлийн яам гээчийг байгуулж сайдаар нь “Женко” Х.Баттулгыг тавих яриа ч бий. Эх сурвалжийн өгүүлснээр, Хөгжлийн яаманд Төрийн өмчийн хороо, Үндэсний хөгжил шинэтгэлийн хороо зэрэг томоохон газруудыг нэгтгэх сурагтай. Өчигдөр л гэхэд ТӨХ-ны даргаар Ц.Нанзаддоржийг томилсон. Энэ эрхмийн хувьд З.Энхболдыг Төрийн өмчийн хорооны дарга байхад Өмч хувьчлалын газрын даргаар ажиллаж байсан юм. Ардчилсан намынханы хувьд сайд болохыг мөрөөдөгсдийн хөлд дарагдаж яамдын тоог бүр 22 болгож байгаа гэнэ.
Тэгвэл МҮДН-ынханд ялгавартай хандсаны гол шалтгаан юу вэ. Алтангадас, Шонхор фракцийнхан эхлээд “Р.Амаржаргал МҮДН фракциа захирч чадахгүй байна. “Фортуна” Н.Батбаяр тэргүүтэй нөхдийнхөө амбицийг дарж зүрхлэхгүй байна” хэмээн шалтаг зааж МҮДН-ынхныг замын эхэнд жийж эхэлсэн. МҮДН-ынхан ч үүнийг ойлгож фракцийнхаа тэргүүнээр УИХ-ын гишүүн Ц.Баярсайханыг тодруулсан. Гэсэн ч тусыг олсонгүй.
Н.Алтанхуяг тэргүүтэй нөхөд УИХ-ын дэргэдэх байнгын хороодын дарга нарын асуудлыг хэлэлцэхдээ МҮДН-ханд бас л ялгавартай хандав. МҮДН фракцийнхан Эдийн засгийн байнгын хорооны даргаар Б.Гарамгайбаатарыг санал болгосон ч З.Энхболдын фракцийнхан “Очиж, очиж “Анод” банкийг дампууруулсан нөхрийг нэр дэвшүүлэхдээ яах вэ дээ. Б.Гарамгайбаатар бол УИХ-д анх удаа сонгогдсон нөхөр. Тиймээс түүнийг ингэж давраахгүй” хэмээн дургүйцжээ. Чухам ийм л учраас “Фортуна” Н.Батбаяр чуулганы танхимд намынхандаа бойкот хийж, фракцийнхаа гишүүдийн картыг сугалсан аж. Өөрөөр хэлбэл, мүднякууд Ардчилсан нам дахь хагарлын цанг дахин дэлдэж, Н.Алтанхуяг, З.Энхболд нарт дайн зарлалаа.

Н.БУДСҮРЭН

http://www.info.mn/c10069.htm