УИХ-ын 2012 оны сонгуулийн дүнгээр аль ч нам хууль ёсны олонхи болоогүй тул хамгийн их суудлыг авсан АН аль нэг

нам, эвслийг урьж, хамтарсан Засгийн Газар байгуулах нь тодорхой болсон билээ.
Дахин МАНАН буй болгохгүйн тулд МАН бус МАХН, МҮАН-ын “Шударга ёс” эвсэлтэй хамтран Засгийн Газар байгуулах нь зүйтэй гэж Н.Алтанхуяг үзэж буй тул хэлэлцээрээ эхлүүлж, сайдын суудлаа хуваарилж эхэлсэн тухай бид өмнө нь мэдээлсэн.
МАН, Сү.Батболд гэхээр л хамаг харшил нь хөдөлчихдөг МоАХ-ы дарга Х.Баттулга ч үүнийг “Муу л сонголт. Гэхдээ тэр МАНтуунуудтай эвсэхээс арай дээр юм” гэж тодорхойлсон байна.
МАХН, МҮАН-ын “Шударга ёс” эвслийнхэн ч үүнийг нэн баяртай хүлээж авсан төдийгүй өчигдөр орой яаран хэвлэлийн хурал зохион байгуулжээ.
МҮАН-ын Ерөнхий нарийн бичгийн дарга Н.Батцэрэг энэ үеэр  “Манай эвслийн удирдлага сонгуулийн үйл явц, үр дүнгийн талаар мэдээлэл авсаар байна. Олон тойрогт хууль зөрчсөн үйл ажиллагаа болсон. Гарч болзошгүй зөрчлийг хаах хууль байсангүй. Одоо бол сонгуулийн дараагийн үйл явц руу орох шаардлагатай гэж бодож байна. Шинээр бүрэлдэх УИХ, Засгийн газрын талаар ард түмэн хүлээлттэй байгаа. Ирээдүйгээ харж ажиллах хэрэгтэй болж байна. Олон түмнээ хүндэтгэж, тэдний эрх ашгийн төлөө хамтран ажиллахад “Шударга ёс” эвсэл бэлэн байна. СЕХ шалгах ёстой зарим зүйл байна. Тухайлбал, Дархан-Уул аймагт Сангийн сайд Д.Хаянхярваа ахмад настан, хөгжлийн бэрхшээлтэй иргэдэд олгох ёстой 670 мянган төгрөгийг тараажээ. Энэ нь Засгийн газрын шийдвэрээр олгож буй төсвийн мөнгө ч гэсэн өөрийнхөө тойрогт давуу эрхээр мөнгө олгосон байна. Энэ бол ёс зүйгээс давсан албан тушаалын хэрэг байх. Ард түмэн энэ жилийн сонгуулиар аль ч нам дангаараа Засгийн газар байгуулах хэмжээний сонголт хийсэнгүй. Үндэсний үзэл бодлоо бодож, улс төрийн хүчнүүдийг хамтарч ажиллах боломж олгосон сонголт болов уу гэж харж байна. Өмнө нь хоёр том нам гэж ярьдаг байсан бол одоо “Шударга ёс” эвсэл нэлээд хэдэн суудал авч улс төрийн гурав дахь хүчинд орон зайгаа оллоо. Манай эвслээс УИХ-д сонгогдож буй гишүүд бодлого, хөтөлбөрөө хэрэгжүүлэхийн төлөө тууштай ажиллах болно. Шударга ёсыг сонгосон ард түмэндээ баярлалаа. Би Сэлэнгэ аймгийн Мандал суманд очоод ирлээ. Тус сумын 10 хэсгийн хорооны есөн хороонд МАХН-МҮАН-ын “Шударга ёс” эвсэл нэгээр гарсан байна. Шударга ёсыг ард түмэн илүү сонгосныг ганцхан сумын жишээгээр харж болохоор байна. Сонгууль дууслаа. Одоо ирээдүй рүүгээ харсан алхам руу яаралтай орох ёстой” хэмээн өгүүлсэн байна.
Харин эх сурвалжуудын өгүүлж буйгаар уг шийдвэрт Ерөнхийлөгч Ц.Элбэгдорж тун сэтгэл дундуур байгаа бөгөөд “АН 2013 онд хэнийг дэмжих вэ? гэдэг бодлогоо тодорхой болгохтой холбоотой асуудал гэж би бодож байна. Та нар Н.Энхбаярыг дэвшүүлэх гэж байгаа гэж би ойлгох гээд байна шүү” гэх зэргээр АН-ын удирдлагуудад хатуу үг хэлсэн бөгөөд МАН-тай хамтарсан Засгийн Газар байгуул, чингэхдээ Сү.Батболдыг хариуцлагатай яамны сайдаар тавь гэх зэргээр шахаж буй аж.

Ц.Жадамба

www.bolod.mn